E virus cu ta causa e COVID-19, ta e miembro di mas nobo di e famia coronavirus. Ainda no sa tur cos di e virus, pero tur dia ta siña mas di dje. Hendenan cu ta bira malo di e coronavirus tin e sintomanan di tosamento, keintura, problema di hala rosea, dolor di garganta y perdida di olfato. E por presenta den un forma leve, pero tambe e por causa pulmonia.
Mayoria hende ta cura, pero tin un grupo di hende cu ta alto riesgo y ta vulnerabel. E grupo vulnerabel aki por haya e parti mas severo di e enfermedad. Nan ta bay tin mester extra oxigeno of interna den cuido intensivo (intensive care), segun dokter Caroline Becker, dokter di pulmon. E grupo di alto riesgo ta hendenan cu edad avansa, esta mas di 60 aña, muchanan hopi jong, hendenan cu tin malesa cronico manera presion halto, diabetes, obesidad, problemanan di curason of pulmon. Tambe personanan cu tin un sistema imunologico abou manera cancer, HIV y etc..
Ora cu un hende ta malo, tosa y ta causa cu drupplets y ta contagia otro hende. E persona ta contagia door di inhala e droplets of mishi cu materialnan contamina y despues mishi na nan cara, wowonan, nanishi of boca. Tin hopi cos cu un hende por haci pa proteha su mes y famia, segun dokter Becker.
Esun di mas importante ta laba man frecuentemente cu awa y habon pa minimo 20 seconde. Haci uzo di hand sanitizer tambe ta yuda. Evita di tosa den man, pero purba di haci uzo di e parti paden di elleboog of por haci uzo di un napkins, benta esaki afo di biaha y no reuza y laba man bon. Na e momentonan aki evita di duna man, sunchi of brasa. Tambe keda cas y evita bay den luganan cu hopi hende, esta evita aglomeracion, el a sigui bisa. Sali solamente den casonan necesario.
“Nos mester purba di no drenta den panico pasobra tin hopi informacion incorecto cu por causa paniconan inecesario”, segun e dokter. Comunicacion ta hopi importante, duna informacion corecto y puntra. Purba di no critica pero yuda otro. No por stop e virus aki mas ya cu e ta un pandemia, pero si por yuda “Flatten the curve”.
