Den cuadro di e maneho y vision nobo pa e ministerio pa loke ta uzo teritorial y tereno, DOW y DIP a cera un colaboracion hunto, pa ataca e problema di construccionnan ilegal.
Segun director di DOW, Marlon Croes, ta construccionnan ilegal cu ta en contra di bouw en woningverordening, esta traha sin un bouwvergunning. E por ta un construccion riba un tereno cu ta destina pa un otro uzo. Por ehempel si ta un tereno cu ta destina pa un cas y ta convirti’e den un parcela comercial, sin e permisonan necesario.
Esey kiermen e ora cu DOW lo actua hunto cu DIP e ora ey. Y tambe ora cu uza terenonan di gobierno ilegalmente. Den cuadro di esey, DIP y DOW tin un aliansa pa por actua hunto y dialuna, nan tabata na Pos Chikito hunto cu DIP, unda cu nan ta haci trabaonan pa sloop un construccion ilegal.
E trabaonan di control lo sigui den e proximo dia of simannan. Esey lo trece cun’e cu lo avisa e doño di e tereno y DOW lo ta sostene DIP den e proceso di control y sloop di e construccionnan cu tin cu haci, haciendo e controlnan di bouw- en woningverordening mas estricto.
E proceduranan
Tin accionnan andando y e proceso cu DIP ta maneh ta cu persona cu a construi algo ilegal riba tereno di gobierno of un tereno cu no ta destina pa loke a wordo traha riba dje, ta haya un advertencia cu loke el a haci no ta di acuerdo cu ley. Ta dun’e e ora en principio un termino di tempo pa e mes actua y ta pidi tambe pa laga sa si e ta actua den e caso ey. Si e laga sa cu e ta actua, e ora ta lag’e cumpli cu e termino cu tin. Si e bisa cu e no ta cumpli of no contesta, e ora DIP hunto cu DOW ta bay pa sloop e construccion ilegal.
Den e caso aki ta trata di un pier, segun Antonio Caster, hurista di e departamento di Toezicht, controle & handhaving di DIP. E pier ta den areanan conserva, cu segun ROP bieu y esun nobo ta un Natuurgebied, unda cu den ningun circunstancia no mag di construi nada. Den e caso specifico aki a informa e persona cu tin tanto periodo pa cumpli y kita e pier. Sinembargo por a tuma nota cu a cuminsa pa kita e pier, pero no a cumpli totalmente. E ora a sigui cu e parti cu a bisa cu lo bay sloop esaki. Esey ta e proceso cu ta andando awor aki, segun Caster.
Construccionnan ilegal
Manera cu director di DOW a splica, si tin un parcela cu ta destina pa traha cas y a construi algo otro riba dje, tampoco no mag. E ora tambe ta avisa e personanan, cu nan tin cu sea kita esaki of ta bin kit’e. Tambe tin por ehempel hendenan cu ta haya un parcela tanto tempo pasa y segun ley bo tin un termino pa cumpli cu construccion di sea cas of edificio comercial y e personanan no ta cumpli cu esaki. E ora tambe ta actua den e casonan asina, bisando cu tin un termino pa traha cas of traha e parcela comercial, pero no a cumpli cu esaki. E ora ta bay over na tuma paso.
Den e proceso andando, ta haciendo un inventarisacion di tur loke tin cu ta ilegal pa wak kico ta bay haci, unda e ta traha, ki parcela ta destina riba dje. Unabes cu tin esey, ta bay sigui tambe cu e proceso pa controla y tuma paso contra esakinan.
