Aruba tin hopi hende cu talento, tanto den adulto como mucha y hoben. Na Hulanda tin un hoben cu ta gusta toca instrumento. Aki ta trata di e hoben Siegfried Hart y e gusta toca drum. E ta causando furor na Hulanda.
Apart di Siegfried Hart cu ta mustra su talento na Hulanda, tin un otro hoben Rubiano. Ta trata di Terrance Green. Ambos hoben di Aruba a demostra nan talento y awo ta forma parti di Super-Sonic Family Album vol. 2. E cantica “Seu Days” ta e prome cu a yega riba e album aki.
E cantica aki el a composita hunto cu Terrance Green, kende ta su amigo desde hopi tempo. Hart ta sumamente gradicido pa forma parti di e Super-Sonic Family Album. Tambe Hart ta gradici na Supersonic Jazz y Kees pa dun’e e oportunidad pa ta forma parti n’e proyecto aki.
Super-Sonic Jazz Festival ta un festival na Amsterdam, n’e luga legendario Paradiso, y esaki ta pasa tur aña. Super-Sonic Jazz Festival ta traha un album compila cu diferente artista cu a toca den e festival. Riba e album nan ta pone cantica original di yen artista.
E aña aki nan a bolbe haci esey. E organisadonan a pidi e artistanan rond Hulanda cu a y no a participa n’e Super-Sonic Jazz Festival pa manda nan cantica cu no a sali ainda. Segun Hart, nan a scoge su cantica “Seu Days” pa pone riba e album. E cantica aki por ta haya tambe riba Spotify.
E fundado di Super-Sonic Jazz a papia cu ne y a splic’e cu e cantica ta manera un highlight riba e album. Nan a pone e cantica aki tambe riba long plate, cual ta esun prome. Door di esey, el a haya oportunidad pa toca den e Super-Sonic Jazz Festival cu e proyecto The Nest di Rotterdam Bird.
Segun Hart, Rotterdam Bird a coy cuater artista cu ta riba e album di e aña aki y pone nan hunto den un studio p’un siman. Aki e artistanan mester a crea cantica y esey ta forma parti di e proyecto The Nest. Cu esey tambe el a toca na Super-Sonic Jazz.
