Diamars 16 di maart, mainta tempran Prome Minister Evelyn Wever-Croes hunto cu colega Minister Xiomara Maduro y Parlamentario Darlene Erasmus a bishita Faith Revival School na Rooi Afo en conexion cu celebracion di 45 aña di Dia di Himno y Bandera. E tabata un mainta cultural sumamente bunita na unda e muchanan a canta, baila, recita poesia y haci oracion. E mandatarionan presente tabata emociona cu e bunita presentacion y impreciona di e manera cu e scol aki ta prepara e alumnonan pa cu e dia tan special aki.
Premier Wever-Croes na su turno a duna un discurso cortico y a conta y intercambia storia di nos Himno y nos Bandera cu e alumnonan. Impresionante pa sa con bon nos muchanan sa e historia aki. Prome Minister a felicita cada alumno pa nan bunita presentacion y gradici e directora y docentenan pa nan esfuerso y dedicacion den siña y prepara e muchanan pa cu Aruba su dia nacional.
Minister Xiomara Maduro tambe a duna su discurso cortico na unda el a splica e muchanan riba e importancia di e dia aki pa cu hisamento di bandera, cantamento di e himno Aruba Dushi Tera y e conservacion di nos dushi Papiamento y con importante e ta pa nos no lag’e bay perdi. Tambe e titular di Cultura a conta e muchanan di e dushi cumindanan criyoyo cu nan por come riba e dia aki y corda nan cu no ta tira sushi riba caminda.
“Mi ta admira cu nos scolnan ta pone asina tanto tempo pa haci un bunita celebracion asina pa eleva nos himno y nos bandera. Danki na e maestronan pa a tuma tempo pa siña nan klas e historia di nos Himno y Bandera”, Prome Minister Evelyn Wever-Croes a expresa.
Dia 18 di maart, Aruba ta celebra un di e logronan grandi di Betico, of cu Betico a contribui na nan grandemente, esta nos Himno y nos Bandera, simbolonan di union y identidad di un pais. Tambe e hecho cu awe Aruba tin su propio gobierno, su propio ministernan, su propio Parlamento, su propio moneda. Y tur esaki a inculca e sentimento di orguyo den nos Arubanonan. Gobierno su meta ta pa e historia aki hamas wordo lubida.
