E prome informa di fayo a drenta na N.V. Elmar pa 4:50 am, mientras cu un rato pasa, pa 11:57 am a anuncia cu henter Aruba tin coriente bek. E motibo di e blackout, ainda no ta conoci, mescos cu e dos otro blackoutnan di aña 2022. WEB pa un of otro motibo nunca ta informa comunidad bek di resultado di e investigacion cu nan ta haci pa por saca afo si ta un eror humano of ta fayo tecnico a conduci cu a paralisa henter nos economia di e forma aki.
Mester menciona cu, locual tabata particular awe ta, cu coriente a bay bin por lo menos dos biaha. WEB a informa cu pa 7:04 am a cuminsa suministra coriente bek. Pues, despues di dos ora di tempo caba por a cuminsa lanta e planta y cuminsa manda coriente pa N.V. ELMAR, cu na su turno ta partie den e diferente substationnan situa strategicamente rond di nos isla, den tur districto.
Pero, pa 9:07 am, WEB a informa cu nan a confronta un di dos fayo grandi den planta di WEB, cu consecuencia cu a presenta un di dos blackout. Esey a conduci cu henter e planta a bay plat atrobe y clientenan cu a haya coriente, a bolbe perd’e. E tipo di situacionnan asina, den cual coriente ta bay bin y ta keda fluctua, sa tin consecuencia cu ta kima articulonan electronico.
Aunke cu WEB ainda no ta menciona nada di e posibel causa, internamente tin rumor cu lo por tin un ke otro di haber cu e recip nobo. Na juni ultimo, dia di e ultimo blackout, a menciona cu e planta RECIP IV tabata den fase di test y no tabatin mucho tempo ta draai riba 100% di capacidad. E planta ainda tabata den proceso di introduccion y consecuentemente no tabata inclui den e sistema di IGMS. Por corda ainda cu na juni, na momento cu e blackout a sosode, a isola e fayo y a inicia e proceso di lanta plantanan RECIP I, II y III hunto cu e boilernan y turbina di gas. WEB a bisa cu conforme su protocol, cu lo sigui un ‘root cause analysis’ pa determina kico exactamente a causa e fayo y con por evita esaki den futuro.
E echo cu nunca mas a bin splica comunidad kico e ‘root cause analysis’ a conclui, awor nos ta keda den incertidumbre si e ingenieronan di WEB a yega na e fayo. Pasobra con por ta posibel, cu dos luna despues cu a paralisa henter nos economia pa via di un blackout, cu atrobe nos ta haya nos mes den e mesun situacion. Algun experto ta sigura cu e planta nobo a bin cu un cantidad di bentaha, pero ta resulta cu e tin mas desbentaha di locual e ingenieronan a premira. Cu por soluciona e retonan awor, no ta conoci, pero e ta causando inconveniencia enorme pa henter pueblo.
Ta nota cu blackout ta birando algo masha “normal” na WEB. Na aña 2009 tabatin un solo caso, na 2010 un solo biaha y despues di esey tabatin tres aña di trankilidad. Na 2013 atrobe un caso, sigui pa 2015 un otro, mientras cu na 2018 tabatin dos caso di blackout. E aña despues, 2019, tabatin un caso y na 2021 tabatin un bklackout atrobe. Pero, e aña aki, pues aña 2022…nos tabatin blackout dia 15 di maart, 9 di juni y awe 22 di augustus. Tres biaha e aña aki a paralisa nos economia pa oranan largo, cu tur consecuencia cu esaki ta bin cu ne.
