Diadomingo den careda di 4’or di marduga, un auto a accidenta na Sabana Liber y a drenta den cura di cas y cu e ocupantenan kier a bandona e sitio di e accidente.
Polis mesora a sali a yega na e sitio y a constata cu aki tabata trata di un “eenzijdig ongeval”, unda un Nissan March preto cu tabata bini for di Kudawecha, direccion Noord, net despues di e bocht na Sabana Liber, a baha for di caminda dal den cura di cas y bolter. Segun por a compronde for di algun persona na e sitio, e dama chauffeur tabata papia cu e caminda tabata muha y p’esey e a perde control.
Sinemabargo e caminda no tabata mustra muha y algun persona na e sitio cu mas experticio, a laga sa cu aki ta trata simplemente di velocidad mucho halto, unda e chauffeur a perde control y consecuentemente baha for di caminda y dal den e cura.
Remarcabel tabata ta cu algun ora prome cu diadomingo a habri, dus diasabra anochi, na e mesun bocht un otro auto tambe a baha for di caminda y a dal den cura di e cas. Den e caso ey, e chauffeur a declara cu santo riba caminda a pone slip.
Polis a tuma tur datos pa asina hinca den nan rapport. E dama chauffeur mes no tabata herida, aunke a menciona cu un ocupante masculino si. Sinembargo ambulance no a bin na e sitio. Un rato despues cu a takel e Nissan March, Polisnan tambe a bandona e sitio di accidente.
