Ling & Sons Food Market ta di fiesta cu celebracion di 50 aña di servicio di Dora Ras.
Dora ta e empleado cu e trayecto mas largo na Ling & Sons. E tin un total di 50 aña trahando como un persona excepcional y ehemplar. E ta encarga di e parti administrativo di e cahanan y el a cuminsa na Ling na 1973 cu Jimin y Hana. E tempo ey e supermarket tawata un supermercado chikito pero cu ya caba tawata trece novedadnan manera haci entrega na cas.
Tempo ey Dora a start manera cahera y asina a sigui crece y a mustra interes den e parti administrativo. Dora a traha cu dos generacion di famia Ling, cual ta menciona tambe den e buki di e historia di Ling & Sons. Un persona semper amabel, reserva y puntual. Un pilar dentro di e supermercado.
Awe Ling & Sons Food Market kier a gradici Dora c’un brindis cu a tuma Dora di sorpresa; un bunita serenata di Mariachi Perla.
Management y Staff ta orguyoso di por sigui comparti cu Dora na Ling & Sons Food Market, e supermercado mas grandi di Aruba unda empleadonan ta conoci pa nan amabilidad, conocemento di producto y na unda semper bo ta haya e miho servicio.
