Dia 4 di april proximo, Dora Kock ta cumpli 83 aña. Un persona c’un testimonio como sobreviviente di cancer, mas di 31 aña atras.
CON TUR COS A CUMINSA
Dora ta corda cu e noticia tabata uno cu e no tabata por a kere ni tampoco acepta. Su prome encuentro tabata cu dokter de Cuba, na Santa Cruz y a bis’e cu e ta dun’e dos pildo. Y despues e mester a bay dokter Lopez y e dokter aki a dun’e e noticia cu e tin cancer y cu ta dun’e tres luna so di bida.
Tabata palabranan cu e no tabata kier a tende nunca. Un noticia cu a dal e duro y el a bay flauw. Ora cu el a bin bij, el a wak su yiu muhe para band’i dje y e prome palabra cu su yiu muhe a bise: “Mama no tin cancer y mama lo no muri.” Dokter Lopez a dun’e tres luna di bida. Yiu muhe di Dora, Mady Kock, a conta con nan a yam’e for di hospital y a bis’e cu su mama a bira malo. Y ta di eynan su calvario a cuminsa.
Famia Kock ta un famia cu ta come di cunucu y esey a duna Dora Kock forsa pa el a sobrevivi e malesa di cancer. Semper nan tabata un famia cu a come saludabel. El a logra supera e malesa e prome biaha, pero despues di algun aña, e cancer a bolbe bek y e biaha aki, el a bin mas agresivo. E tempo ey, dokter Lopez a opera Dora y cu e lo haya su kimo na Venezuela.
LUCHA CONTRA DOKTER
E di dos biaha cu e cancer a bin bek, e yiunan a hipoteca nan cas pa paga un profesor pa haci e operacion. Dora a tuma bestraling na Venezuela un biaha. E di tres biaha cu e famia a bay Venezuela, e dokternan a bisa e famia pa nan trece nan mama Aruba, pasobra cu nan mama ta malo y cu e lo bay muri.
Eynan e caminda di cruz a cuminsa pa e yiunan, pa nan cuminsa pensa y busca e manera pa hiba nan mama Hulanda, ya cu e operacion cu Dora mester a haci, nan no ta hacie na Venezuela. Pero mester a mustra e comision di Aruba, cu na Venezuela no ta haci e operacion di dos colon di stoma y cu ta na Hulanda so nan ta hacie, na Utrecht.
Pero e tempo ey, Dr. Engelbrecht, Dr. Lopez, Dr. Ho-Kang-You, Dr. Sjiem-Fat, nan tabata den e comision y nan a bis’e cu e placa ey nan por uz’e riba un persona mas jong, ya cu Dora lo muri toch. E unico cu no tabata di acuerdo cu e otronan tabata Dr. Engelbrecht. Cada uno tabata riba un punto negativo y pa forsa e famia acepta loke e dokternan ta bisa.
Mady a sigui bisa “no acepta e herment, e pensamento mas grandi ta, pa bisa cu bo no ta kere.” Di e manera ey, ta corta e pensamento hunto cu nan, cu door cu nan ta dokter nan sa miho. Como ser humano, e dokternan por haci fout. Ta Dios so por pone e guia pa e persona por surpasa e malesa y e mal noticia.
