Awe ta Dia Mundial di Conscientisacion riba Abuso di nos Grandinan, cu ta un dia caminda a trece e fundacionnan hunto na Aruba, riba e situacion actual y tambe riba e ultimo decision di gobierno pa permiti bishita di nos grandinan. Courtyard by Marriott Aruba Resort a bishita Stichting Thuiszorg Aruba pa celebra e fecha importante aki y a hiba varios macuto di comestibel pa sostene nan.
Eliana Fun, Director di Benta & Mercadeo, a menciona cu ta importante pa comunidad bin hunto y brinda sosten. E comunidad di nos grandinan, tabata esun mas vulnerabel den e tempo nan aki cu Covid-19, pasobra tabatin hopi restriccion. Nan famianan no por a bishita nan. Tambe tin e parti economico cu e fundacionnan a confronta reto cu esey.
Courtyard by Marriott Aruba Resort ta convenci cu siman pasa, ora a elimina e restriccionnan, cu famia por a disfruta atrobe cu grandinan y mustra nan con importante nan ta.
Covid 19 a bin cu yen di problema. Sa cu tur e fundacionnan a wordo afecta severamente pa via di e crisis economico. Dia di Conscientisacion di Abuso di nos grandinan ta hopi importante. Nan tabata e pilar den pasado y nos tin cu reconoce nan importancia pa nos, pasobra nan ta nos historia.
Thais Tromp di e departamento di finansas di Stichting Thuiszorg a splica cu nan ta tuma tur donacion cu hopi amor, pasobra cualkier ayudo ta hopi grandi, vooral sabiendo cu bo ta un instancia priva cu bo no ta wordo yuda financieramente. Tur ayudo ta mas cu bon bini, Tromp a menciona. El a agrega cu e grandinan ta biba den e cas y pa nan no tabata un cambio drastico.
E unico diferencia ta cu nan no tabata tin contacto fisico cu nan sernan keri. Esey tabata e cambio mas grandi pa nan mes. E contacto si tabata tey semper via telefon of videocall. Semper tabata tin e contacto si ainda cu e famianan.
