Caranan conoci den comunidad a uni recientemente den un evento cu a haya e nomber di “Black Lives Matter” y cu a tuma luga den Carnival Village na San Nicolas. Tur presente a scucha y comparti mensahenan di orguyo y experencianan personal di discriminacion na Aruba. Tambe un orador a papia riba bida di George Floyd, kende a muri door cu un polis a pone rudia riba su nek, y cu esaki tabata un intencion racista.
Earl Euson, docente na IPA, a scucha Clementia Eugene bisa cu e hendenan di San Nicolas tin menos oportunidad y diferente otro situacion. El a yam’e y papia cu ne bisando cu esaki mester tuma luga tambe na San Nicolas, manera el a tuma luga na Oranjestad. E tabata kier pa otro hendenan di color tende kico ta pasando. Euson a bisa cu aki na Aruba no ta mata hende di color manera ta haci na Merca, pero tin diferente manera pa mantene hende abou.
Lucaskjo Pieternella Schmidt di Scol di Arte ta haya cu e informacion di “Black Lives Matter” tabata hopi bon. Hendenan di diferente parti di Aruba a bini hunto na Carnival Village, demostrando cu “Black Lives Matter”. Pa cu e situacion di discrimina hendenan di color scur, el a bisa cu mester educa muchanan cu tur hende ta igual. No mester mira color y di unda uno ta bin pero pa tur biba feliz cu otro.
Jacqueline Woodley, docente, tabata inspira pa ta presente na e evento aki, pasobra e mes ta hende scur y tin cierto experencianan den exterior. Di a studia tanto na Aruba como Hulanda, su tata a pone realisa ken e ta y cu nunca mester keda keto. Un experencia cu el a pasa aden tabata ora di a bay entrevista pa trabou na Hulanda. Door di su fam, nan a kere ta hende blanco, pero despues di a realisa ta hende di color nan a bisa e no ta pas pa ta cu nan door di su color. P’esey e tabata presente na e evento aki pa otro sa ken nan ta, pa asina nan por representa nan mes of otro.
Nathan Perez a participa na e evento di un organisacion di hendenan cu ta para p’e “Black Lives Matter”. E ta di pensamento cu no mester ta un hende di color scur pa bin apoya. Un grupo di hobennan a presenta y yuda promove pa stop discriminacion na Aruba. Hopi hende ta pensa cu no tin discriminacion aki, pero realidad ta discrimina no solamente color scur pero un mucha cu su mayor ta origen Asiatico of Latino.
