“Awe mainta mi a wordo honra cu e titulo di Doctor in Medicine Honoris Causa pa Xavier University pa e liderasgo di nos pais y trabounan den enfrenta e pandemia”, asina Minister-president demisionario, mr. Evelyn Wever-Croes a anuncia diasabra mainta. El a sigui bisa cu “Mi a acepta e honor aki den nomber di henter nos Gobierno y nos CrisisTeam, pasobra e ta un trabou di ekipo y sin e trabou duro di henter e ekipo, nos no tin e pais aki ta recupera. Masha danki.”
Kico e honor ta nifica?
E titulo “Doctor in Medicine Honoris Causa“ ta e honor di mas halto cu e universidad ta otorga. Ta otorg’e sin e necesidad di a cumpli cu e rekisitonan pa competa grado di educacion. Honoris causa ta traduci den e idioma Latin: “pa e honor”. Ta otorga e doctoraal den ciencia medico (Honoris Causa) na personanan cu a realisa contribucionnan significativo den e area di ciencia medico y na e sociedad.
Doctor Honoris Causa na Aruba
Minister-president mr. Evelyn Wever-Croea no ta e prome persona pa haya un honor asina na Aruba. Den politica sa cu su mesun omo, Rudy Croes, a ricibi dicho distincion di e hunta di Gobernadornan di Euro-Panamericana, tempo cu e tabata ocupa e puesto di Minister di Husticia na 2012.
Pa su hacimento di aña na april 2009, na ocasion di celebracion di su di 89 aña di bida, a honra Juan “Padu del Caribe” Lampe cu e distincion di “Doctor in Honoris Causa” for di Universidad di Zulia, di Venezuela. E homenahe ta debi na su esfuerso y dedicacion na musica, pintamento y na envolvimiento humano.
Xavier University School of Medicine Aruba
A funda e scol di medicina, Xavier University School of Medicine Aruba (XUSOM) na aña 2004 y nan ta autorisa pa gobierno di Aruba, cu autorisacion di e Ministerio di Enseñansa pa otorga e titulo di Doctor den Medicina. E scol ta situa den Santa Helenastraat na Oranjestad, cu un campus grandi y cu hopi espacio. Otro campus di pre-medicina ta situa na Jordania, Jenin, India y Ghana. Xavier University School of Medicine Aruba (XUSOM) ta ofrece dos programa; e programa Pre-med y e programa MD. E prome ta un programa di cinco aña y mey. E ta pa studiantenan cu ta bin di un scol secundario of pa studiantenan cu no a caba cu tur rekisito adelanta. E prome aña y mey di e curso ta implica lesnan di pre-medicina na e campus di Aruba. Despues di caba e aña y mey, e studiante por haci e transicion pa e programa di MD.
E estudio medico na Xavier University
E programa di MD na XUSOM ta tuma cuater aña calendario. Durante e prome añanan, e programa ta cubri e ciencianan basico. E studiantenan ta studia na e campus di e universidad na Aruba y den e ultimo dos añanan, ora ta cubri e ciencianan clinico, e studiantenan ta haci stage den hospitalnan afilia na e universidad den Merca. E prome dos añanan ta concentra den e disciplina tradicional de ciencianan basico. E experiencianan di laboratorio ta un parti integral di e prome dos añanan, hunto cu discusionnan den gruponan chikito pa e lesnan basa den sistemanan y e integracion trempab di e ciencianan basico den experiencia clinico. E cursonan di ciencianan basico ta uza conferencianan didactico, instruccion di laboratorio, instruccion complementario, lesnan basa riba casonan y revisionnan basa den preguntanan. E scol ta ofrece e examen NBME CBSE y e curso di revision di Kaplan pa e USMLE Step1. Xavier tin un tasa di aprobacion di 96%. E plan di estudionan total pa e rotacionnan clinico ta di 76 siman, cu ta inclui 12 siman di investigacion y introduccion na medicina clinico, 44 siman di rotacionnan basico y 20 siman di rotationnan electivo. Ta realisa e rotacionnan clinico na Merca.
Tocante Evelyn Wever-Croes
Evelyna Christina “Evelyn” Wever-Croes, un hurista y fiscalista, naci dia 5 di december 1966, a asumi e puesto di Minister Presidente di nos pais dia 17 di november 2017. El a bira e prome hende muhe pa encabesa gobernacion di pais Aruba, despues di Henny Eman, Nel Oduber y Mike Eman.
El a participa den eleccion pa prome bes pa Partido Movimiento Electoral di Pueblo (MEP) na aña 2009 como candidato number 3 riba e lista y a logra 1621 voto. Na aña 2011 el a asumi liderazgo di e partido cu su mesun omo a funda na 1971 y a bira e prome lider femenino di e partido, despues di defunto Betico Croes y Nel Oduber.
Como lider den eleccion na aña 2013 el a logra 3396 voto individual, den e eleccion na September 2017, aunke e partido a bay dilanti cu 2 asiento, toch e votonan individual no a aumenta tanto, pero tabata bon pa 3503 voto riba nomber di Evelyn Wever, cu a representa un aumento di 3.15%. Den e ultimo eleccion, Evelyn Wever-Croes a kibra su mesun record di voto, ora el a redobla su votonan personal y a yega 7518 voto riba su nomber…y a hacie e “vote-getter” di Aruba den eleccion 2021!
mr. Evelyn Wever-Croes a studia ley na Universidad di Antias na aña 1985. Despues el a sigui pa Leiden, Hulanda, unda el a studia ley fiscal (Belastingrecht) te cu aña 1989. El a traha como Inspector di Impuesto di Aruba entre 1989 y 2003, trahando bou Gobierno di AVP y MEP. Ora di nombra director nobo, a scoge un otro persona riba dje, cu consecuencia cu Wever-Croes a opta pa sigui su carera profesional como abogado y alabes fiscalista na e oficina di abogadonan Croes, Wever & Tchong desde aña 2003 pa 2010, ora cu el a dedica completamente na politica.
Evelyn Wever-Croes ta casa cu Kenneth Wever desde aña 1991 y ta mama di Claudine Wever, Christine Wever y Kevin Wever y ta wela di Trystan Wever.
