Docentenan no ta reconoce Rudy Lampe mas como nan Minister di Enseñansa

Diaranson atardi, docentenan a reuni un biaha mas dilanti di Bestuurskantoor, cu nan respectivo sindicatonan, pa asina entrega un manifiesto. E docentenan a cana for di ex Julianaschool te cu dilanti di Parlamento pa despues sigui pa Bestuurskantoor. A spera cu nan lo por a haya Minister di Enseñansa pa nan por entrega nan manifiesto.

Presidente di SIMAR, Josephine Martilia-Albertus, hunto cu e docentenan preocupa y cu ta desaproba e maneho di Minister Rudy Lampe tabata kier pa Minister Lampe bin pafo pa ricibi e manifiesto. E situacion ta uno fastioso. Pa varios tempo caba e Minister tabata bezig cu algo cu no ta caudra y e docentenan a desaproba su maneho.

E docentenan un rato prome tabata a Parlamento di Aruba y a entrega e manifiesto na vice presidente di Parlamento, Alan Howell.

Durante di e manifestacion, e docentenan tabata tin un T-shirt bisti bisando “Enseñansa bao Atake” cu bao di e departamentonan no ta normal.

Mayoria di e departamentonan cu ta cay bou di e Minister di Enseñansa, pa loke ta trata TraiMerdia, SPO, MDC, no ta di acuerdo cu e minister. Casi por bisa cu nan no ta reconoce e Minister mas como nan Minister di Enseñansa, mirando e situacion y e actitud cu e Minister ta bin cun’e p’adilanti pa loke ta su maneho.

Secretario General di SEPPA, Magali Brito a señala na e vice presidente di Parlamento cu e docentenan ta drenta den un vakantie no trankil. Nan ta spera cu Parlamento como organo mas halto di Aruba trata e caso aki cu seriedad. A pidie tambe ki dia lo tin un contesta riba esaki. E vice presidente a comenta cu e ta purba di trece esaki dilanti dentro di 10 dia.

Pa loke ta Bestuurskantoor, Vice Prome Minister Otmar Oduber, a baha y a tuma e manifiesto. Josephine Martilia-Albertus a entrega e manifiesto na e mandatario. Ta trata aki di un copia di mocion di desconfiansa cu a entrega na Parlamento di Aruba. Segun e sindicalista, si mira esnan encarga cu enseñansa, nan a haya diferente cos cu ta imponi riba nan, ta desbalora nan. Si sigui wak, aunke cu a haya for di Parlamento cu varios cos a wordo poni on hold, toch e Minister ta sigui. Si mira MDC nan tabata tin un caminda hopi largo.

For di 2018 a entrega un mocion y te ainda no tin claridad pa e docentenan. Te ainda e trahadonan ta bao di atake. P’esey cu e manifestacion aki kier a bisa cu e docentenan ta spera y ta adverti tambe na e mesun momento cu si no bin un cambio pa e aña escolar nobo, cu ora e aña habri, nan tey bek dilanti bestuurskantoor. Den vakantie nan no kier tampoco no bin cu cambionan drastic. Hopi biaha cu net den vakantie, ora cu nan no tey, tambe nan ta haci’e. Y ora cu yega aña escolar nan ta enfrenta cu cosnan imponi. Pesey e docentenan ta spera cu Gobierno tuma e manifiesto na su debido atencion, pero tambe un solucion na bienestar di e muchanan, e docentenan y e comunidad en especial.

 

E mandatario a ricibi copia di e carta di desconfiansa contra e Minister di Enseñansa. E mandatario encarga mes no a sali pa ricibi e manifiesto, contrario na e Vice Prome Minister apesar cu e docentenan tabata kier pa el a baha.

Vice Prome Minister a comenta cu lo trece esaki dilanti den Conseho di Minister mas tarda pa diamars otro siman, pa mira ki solucion por bin cun’e. Hunto cu e demas ministernan ta busca un solucion pa e docentenan. Gobierno kier trankilidad, el a menciona, den mundo di educacion. Kier pa e maestronan por sinti nan mes comodo pa un trabao asina duro cu ta haci, caminda cu nan ta educa nos yiunan y yiunan di tur esnan cu ta biba na Aruba. Pero tambe mester trankilidad mental pa cada un di nan. Lo percur pa traha riba esaki den Conseho di Minister cu tur minister envolvi. Despues di diamars otro siman lo percura pa tin un contesta.

MDC

Magali Brito di SEPPA a menciona, prome cu e minister a drenta paden, caminda cu den e documento ta enfoca riba liñanan grandi loke ta biba den enseñansa. E tema di Centro Multidisciplinario ta keda urgente. Si mira kico ta biba diariamento cu e departamento aki, e ta un masacre. Esaki si ta birando imposibel, pa sostene un maneho di e forma aki. Ora cu ta mira cu e titular cu ta carga enseñansa no ta mira e necesidad pa sinta cu e profesionalnan na mesa. Yega na un maneho cu ta cubri e necesidadnan pa Aruba. Sa cu diamars e Minister a duna atencion na e grupo aki. Pero cada dia cu pasa ta urgente pa e trahadonan aki. Ta pa e motibo aki a pidi Conseho di Minister pa avansa e discusionnan y pa yega na un decision mas pronto posibel, pasobra e claridad cu e trahado y docentenan mester, pasobra na final nan ta carga e stress. Un sociedad mester tin claridad kico un maneho cu un Gobierno ta bin cun’e. No locual cu un minister kier impone den enseñansa.

Segun e Minister, el a papia cu e mandatario encarga, kende ta conciente di un email manda pa sindicato. Kier duna e proteccion y siguransa na e empleadonan, cu manera palabra pa e siguiente reunion di diamars, lo duna un contesta riba esaki cu ta sigur y duidelijk pa tur.

Magali Brito di SEPPA a comenta cu a entrega e manifiesto cu e puntonan cu treci pa e docentenan y tur esnan cu ta labora den enseñansa. Parlamento, manera cu nan a trece dilanti, ta warda cu su demas coleganan yega di exterior. Pero si lo sa di mande delanta kico e documento ta encera. Basicamente e mocion di desconfiansa cu e docentenan tin contra e minister. Ta spera cu mas lihe posibel Parlamento por fiha un posicion aki. Si pone den corelacion cu e Vice Prome Minister tambe a indica, nan ta spera cu otro siman cu e Prome Minister, Evelyn Wever-Croes ta na Aruba, lo trat’e den un base amplio.

Diamars nan a indica cu nan tambe ta preocupa cu e direccion cu enseñansa ta bayendo, principalmente e hecho cu e grupo di docente no ta contento y pa bisa no ta feliz, mas ainda no ta trankil y con un grupo di trahado aki intrankil por sigui traha cu mucha, cu ta futuro di pais Aruba, con por percura pa esaki. Ta e unico manera pa partidonan tuma decision, den e caso aki sea Gobierno ta tuma decision. Pero tambe por spera un cambio di actitud, un cambio di postura, un cambio di maneho na bienestar di tur esnan cu ta goza di e servicio den enseñansa. Muy en particular, teniendo cuenta cu e bienestar y desaroyo di un pais cu ta importante. Enseñansa ta forma parti di un di e metanan cu tur pais rond mundo mester tene cuenta cun’e y cumpli cun’e den 2020.

Mocion di desconfiansa

Brito a sigui splica cu si mira bon, a bin den curso di ultimo simannan ta vocifera diferente preocupacion, di problemanan cu ta sufri na pia di trabao. Cronologicamente a entrega un documento di e cantidad di trabao y intentonan cu a haci pa e Minister duna atencion of cambia su postura. Riba ningun di esakinan el a duna oido. Si mira tambe, con el a trata e temanan aki den Parlamento, e ta bagatelisa e posicion cu Parlamentarionan a tuma. E ora ey ta mira cu no tin respet, ni pa e instancia mas halto di pais Aruba, corda pa e profesionalnan. Esaki ta loke a ilustra tambe na Prome Minister. Diamars un biaha mas na e Vice Prome Minister. Awo nan tin un bista hopi mas cla di kico ta pasando y a mustra tambe cu cada biaha palabracionnan ta cambia.

Por ehempel na SPO e tabata tin un gentleman’s agreement na januari, y awo aki el a sigui cu e direccion cu e tabata kier, cambiando su palabra.

Aña pasa tambe, a bisa despues di diferente accion di esnan cu ta atende scolnan publico, mirando cu kier a pone e scolnan aki bao di un stichting, tabata a base di e diferente posicionnan cu a mustra na Parlamento cu por bisa cu el a pone on hold.

E palabra “on hold” nos tur por compronde, pasobra ta algo di tur dia. Pero su practica ta totalmente diferente di loke e ta papia. Ta paar di biaha ta mustra e gobernante cu den e forma aki no por traha pasobra no tin confiansa y no ta kere den su palabra mas tampoco.

E mocion di desconfiansa ta entrega na Parlamento. Ta compronde e tactica cu den dianan di vakantie di docentenan, lo kier of lo purba pa trece cambionan cu por perhudica nos enseñansa. Pesey mes ta pidi na Conseho di Minister pa no permiti ningun cambio drastico. Dado caso cu e lo sosode, nan lo bin bek. Na e mesun momento ta adverti cu si sigui den e direccion aki, lo haya e aña escolar cu problema y riba e prome dia di scol lo para dilanti bek dilanti di Bestuurskantoor cu e mesun exigencianan y nan mesun voz di protesta cu nan no tin confiansa den e minister.