Na dr. Horacio Oduber Hospital tin un bureau cu ta asisti cu casonan dificil di turista pashent cu ta asisti e hospital, nan por bay hopi leu den pone pashentnan di exterior paga nan cuenta. Dus esnan cu ta haya asistencia medico y/of no kier paga bisando cu nan seguro den exterior lo paga e cuenta, resultando despues cu esaki no ta pasa, e bureau aki ta encarga cu esey.
Pa turistanan, nan ta paga tres pa cuater biaha mas cu un local pa asina nan contribui mas n’e pochi di cuido y cu e placa aki keda inverti bek na pais Aruba. Sin embargo e perdida mas grandi pa hospital ta bini for di personanan indocumenta segun Jacco Vroegop, director di dr. Horacio Oduber Hospital a declara durante programa di Enfoke dialuna merdia.
Ta papia aki di 150 pa 250 mil florin pa luna, mas o menos 2 miyon pa aña, y algun aña e tabata ariba 3 miyon den gasto medico na personanan indocumenta. Hopi di e hendenan aki ta bini pa asistencia medico pa cosnan hopi mas serio unda bo tin cu haci algo y ta bira dificil pa nenga nan.
“E vision di hospital ta pa tin asistencia medico accesibel pa tur hende, dus nos ta yuda hende cu no ta documenta, mi ta haya nos como hende mes por yuda otro. Sin embargo nos tin di papia riba con pa cubri e costo nan pasobra si no otro hende ta keda perhudica,” segun e director.
