Recientemente Minister di Finansa, mr. Xiomara Maduro a ricibi un grupo di duanero cu a cumpli 30 aña den servicio di gobierno haciendo un trabou na bienestar di comunidad. A organisa un ceremonia cortico den sala di reunion di Bestuurskantoor, den cual e mandatario a felicita e grupo, tur hende muhe, pa tur nan añanan di dedicacion, sacrificio y lealtad na nan pais. Departamento di Aduana Aruba ta un organisacion importante cu ta percura pa un fuente stabiel y creciendo di entrada anualmente den caha di gobierno.
E hubilarionan ta: Arlinda v/d Biezen, Ivette Semerel, Wilfrida Croes, Vivian Geerman, Omaira Franken, Tania Sint Jago, Tina Croes, Raquelita Tromp, Maribel Nuboer, Reyna de Cuba, Mildred Peña y Jacky Oduber.
Den presencia di director y e chefnan, Minister Xiomara Maduro a entrega cada hubilario nan decreto gubernamental corespondiente hunto cu un recuerdo pa conmemora e momento special aki. Durante e entrega, director di Departamento di Aduana Aruba, Ricky Croes, tambe a hiba palabra pa conta un anecdota positivo di cada duanero pa asina demostra e aprecio na cada hubilario.
