Poco poco pero sigur nos ta sali for di e pandemia di COVID-19, mirando cu mas hende ta recuperando pa dia.
Pa loke ta e resumen di e dia di awe, 10 persona a recupera, a registra un total di 11 caso nobo di COVID-19, di cual 5 ta no-residente. E cantidad total di testnan ehecuta ayera na e diferente localidadnan na Aruba, entre otro laboratorio di hospital, laboratorionan priva y aeropuerto ta 530 test. ‘Positivity rate’ entre nos residentenan ta 6 %.
Casonan activo pa awe ta 96, cantidad di fayecido relaciona cu COVID-19 ta 104.
Hospital ta informa cu tin un total di 19 persona interna di cual 7 ta den Cuido Intensivo y 12 riba unidad general di COVID.
TESTMENTO
Tambe kier a recorda cu awo e testnan di COVID ta mas facil y accesibel. Esaki ta specialmente a esunnan cu tin sintomanan di e virus.
Cu e meta di por sigui test mas persona cu sintoma di COVID-19 cu ta posibel y yuda stop di plama e virus, ta introduci un otro metodo pa comunidad por aplica pa un test, unicamente den caso cu tin sintoma.
Esun cu tin sintoma di COVID y tin un AZV por subi e siguiente link. http://arubacovid19.org/test y yena tur informacion aden. Ora cu tur dato ta yena, e sistema lo genera un codigo y via un e-mail lo manda e persona su codigo.
E persona lo mester yena e codigo aki den su Aruba Heath App door di primi riba e icon di Test pa COVID-19.
Esaki ta un servicio mas banda di cu e pashent por tuma contacto cu su dokter di cas y tambe e por yama 2800101 pa haci test tambe. Esaki ta un di e tres maneranan cu un persona por aplica pa haci un test.
