Diasabra mainta cuminsa pa 7:00 am iglesa Pentecostal di Aruba ta tene un ‘outreach.’ Aki nan ta bay parti sopi y tratado, pero tambe ta bay tin un mita dia pa expresa nan mes.
Pastoor Marcel Balootje di iglesia Pentecostal di Aruba ta invita tur hende pa yega cerca nan, unda cu por tin un encuentro grandioso cu otro. E plan ta pa papia riba e tres tratadonan y duna e ayudo cu un persona mester. Nan tin un seccion special pa cada persona cu ta pasando den un dificultad sea di droga of algo. Nan por papia cu e persona y gui’e riba e bon caminda.
Mañan nan ta duna gratis tres tipo di sopi cu ta sopi di galiña, carni y pisca. Segun pastoor Balootje, wak pa tur hende t’ey pasobra ta directamente fo’i stoof ta bini cu ne, cayente pa asina e persona por sinti su mes den famia. “Pa bo sa cu eynan ta bo cas”, el a expresa.
Iglesia Pentecostal di Aruba ta invita comunidad pa presenta diasabra mainta na nan outreach. Nan ta cuminsa pa 7:00 di mainta, pero ta cuminsa sirbi sopi pa 8:00 di mainta. “Pasa cerca nos, ricibi e tratado aki, ricibi informacion dje palabra di Dios. Y cualkier problema cu bo ta pasa den dje, nos ta cla pa duna un man”, el a bisa na final.
