Artistanan local no ta para keto. Aunke cu ta den pleno pandemia, pero inspiracionnan ta drenta cada momento y ta haci cu e artistanan ta bira creativo. Avali ta un di e artistanan aki cu a sa di saca un cancion, cual e tabata tin warda pa basta tempo.
Conoci como Lislaine Bermudez, a bin cu un proyecto nobo y esey ta Acercate. Un tema di combinacion urbano, reagueton slow cu kizomba, tabata un idea espontaneo. Segun Avali, un dia e tabata haciendo algo pa pret, ora cu el a manda e idea aki pa dos persona cu a gusta esaki super hopi. Tabata motibo pa pusha Avali pa sigui cu e idea aki pa asina producie.
Dia 3 di februari proximo, lo saca e cancion aki. Pero for di luna di juli caba e tabata cla. Avali a cuminsa skirbi e cancion na december di 2019, ora cu e idea a surgi pa haci algo riba dje, tabata mas den januari. A traha tiki tiki riba dje, mirando cu e no tabata tin pura.
Despues di a prepare bon y cla pa saca un videoclip, tur cos a para debi na e pandemia di COVID, virus cu Avali tambe a haya. Una bes recupera, e trabaonan a sigui y por a yega na su culminacion.
E contenido
E cantica mes ta na Papiamento, aunke na principio tabata na Spaño. Avali mes no tabata sa ki titulo duna e cancion, pero di un manera of otro Acercate a bin y a keda.
Acercate no ta un cancion cu Avali a haci su so. E tin un team su tras. Chris Strick di Corsou a colabora den e tema aki. A pesar cu e no conoce personalmente, nan a sa di saca un produccion, cual Strick a sinti’e manera cu el a scuche. Avali mes no a spera cu Strick a gusta e produccion y tambe a bula riba dje. E cancion aki ta e prome di Avali y trahando cu Chris Strick a haci cu e ta sigur cu e tema aki lo ta un hit no solamente na Aruba, pero cerca e publico afo.
A gusta e cancion
Chris Strick mes a menciona cu e mes no sa nada di Avali, sinembargo e cantica cu el a scucha, el a gusta. E mes ta haya hopi cancion pa scucha. Loke a hala e atencion di e tema aki ta, e cancion tabatin un stem cu e no conoce. E tabata algo cu no ta bay haya Strick facil riba un tema asina y esey el a haya great. A sac’e for di su zona di comfort.
E letranan a bin y Strick a grab’e mesora. A manda un draft Aruba, unda cu esaki tabata hopi gusta. Strick stima canticanan cu tarda pa sali. Esunnan warda pa dos y tres aña, eseynan ta bira un cantica grandi.
Aruba pa Strick ta su di dos cas. El a traha cu hopi artista Arubiano, manera cu Ataniro, Jeon, Rocco. Y awo trahando hunto cu Avali, e ta sigur cu pueblo henter, di Aruba, Boneiro, Corsou, Hulanda, entre otro, pa asina keda pendiente pa diaranson di e lansamento di Acercate di Avali hunto cu Chris Strick.
