Cu un anochi titula Tertulia “Cosecha di 2018” Fundacion Lanta Papiamento ta clausura un exitoso Aña di Papiamento. E nochi literario y musical aki lo tuma luga diahuebs 20 di december di 6 or pa 8 or di anochi na Biblioteca Nacional den Madurostraat.
Pueblo ta invita pa bin celebra e logronan di nos idioma Papiamento den 2018 y pasa un rato ameno cu participacion di Jerry Franca, Rosabelle Illes, Dufi Kock, Benjamin y Ramon, Belén Kock-Marchena, Daniella Britt, autornan cu a publica den aña 2018. Ademas por gosa di musica y baile di nos hobennan. Lo tin buki na benta, bar y cushina. Na entrada lo tin tin cahita feliz pa ricibi contribucion di esnan cu kier sostene e actividadnan di Fundacion Lanta Papiamento.
Fundacion Lanta Papiamento (FLP) ta gradici Minister di Enseñansa Dr. A Lampe y Minister di Cultura Mr. X. Ruiz-Maduro pa a honra e peticion pa proclama 2018 como Aña di Papiamento, como cu den 2018 Papiamento ta celebra 15 aña como idioma oficial di Aruba.
E acogida den comunidad tabata y ta grandioso. Den aña 2018 FLP tabatin hopi actividad grandi relaciona cu nos idioma Papiamento, entre otro Celebracion di Dia di Idioma Materno dia 21 di februari, Feria di Papiamento dia 19 di mei, Conferencia di Papiamento riba dia 26 y 27 di october, presentacion di “E Caya di Monche” dia 29 di november. E actividadnan aki por a conta cu un publico masha grandi y entusiama. Banda di esakinan FLP a coopera cu diferente actividad di Departamento di Cultura, manera Arte di Palabra y Poeta di Patria.
Importante ta e echo cu 2018 a bira un “Aña di Papiamento” den cua nos por mira un crecemento di aprecio y respet pa Papiamento, un crecemento di e baloracion positivo di nos idioma, tanto den gobierno, como den sector laboral, den enseñansa y den comunidad. Cu e ambiente ta fertil awor pa Papiamento, ta keda demostra cu algun decision importante cu a keda tuma. Por ehempel, e decision cu Scol Multilingual lo keda introduci na tur scol na Aruba ta un paso increibelmente importante. Hopi hende den nos comunidad ta pidi pa mas curso di Papiamento, e sindicatonan a cuminsa publica nan CAO na Papiamento. Pero claro cu tin hopi cos mas cu nos kier mira realisa, por ehempel mas uzo di Papiamento riba nos borchinan canto di caminda di propaganda y di trafico, bon uzo di Papiamento na radio y television, den corant y riba internet. Sinembargo, nos ta riba e bon caminda, esey ta sigur. Ta nos mes mester defende y sigui desaroya loke nos tin; ningun hende no ta hacie pa nos.
For di e espacio aki Fundacion Lanta Papiamento ta desea henter Aruba un Feliz Pasco y un Aña 2019 exitoso.
Fundacion Lanta Papiamento ta invita tur hende pa bin celebra cu henter famia diahuebs awor, esta dia 20 di december, clausura di Aña Papiamento y Fin di aña 2018 cu un anochi ameno. Nos ta topa na Biblioteca Nacional, di 6.00 or pa 8.00 or pm. Un boca bisa otro! Bini un, bini tur!
