Diaranson e Abraham de Veerschool a organisa un dia deportivo pa su alumnonan na Joe Laveist Sportpark.
Roy Broekman, docente Lichamelijke Oefening na Abraham di Veerschool, a bisa cu nan tabata tin diesun wega unda cu e alumnonan tabata por a participa. E weganan tabata tanto paden como pafo di e stadion. Algun di e weganan aki tabata futbol, kickball, trefbal, tur esakinan tabata cu awa tambe.
E sportdag di ayera, tabata pa cera e ciclo di examen. E tabata un dia normal di scol, pero na un otro manera. Na scol tur les ta bay via buki, pero diaranson, nan mes tabata por a scoge con nan ta hinca e dia den otro. Nan mes tabata yena e dia, door di participa n’e weganan, manera cu nan kier. E no tabata un competencia, no tabata tin ganado, pero simplemente un dia di scol relahante, na un manera diferente.
Broekman a gradici tur esunnan cu a yuda nan pa haci e dia aki un exito rotundo. Dos banco local a yuda e scol pa asina nan por a cumpra e materialnan necesario pa sigui stimula e muchanan den haci ehercicio, pa keda den movecion.
Edna Vinck, docente y begeleidster na Abraham de Veerschool, a indica cu tur aña nan ta organisa e dia deportivo aki, pero e organisacion ta den man di e vierde klassernan. E ta un proyecto cu nan mester cumpli cu ne pa asina cera e ciclo aki di Lichamelijke Oefening.
Aunke e proyecto tabata den man di e alumnonan mes, nan tabata haya guia di e docentenan, di con pa organisa e actividad, con pa drenta contacto cu e potencial sponsornan. Nan ta siña diferente cosnan pa cual nan mester tin e cualidadnan necesario pa guia un proyecto.
Cada mucha ta haya nan tarea den esaki pa nan desplega. Tur hende ta haya na tarea y na ultimo tur ta wak con e proyecto a keda.
Tur e muchanan cu a participa a haya nan cifra pa gym.
E actividad aki a conta cu participacion di tur e klasnan, cu excepcion di e vierde klasnan. Dus for di eerste te cu derde. Y tur mucha a haya un puntuacion pa nan participacion. E scol ta conta c’un total di 240 alumno.
