Dia prome di juni t’e prome dia di Pride Month, cual ta un celebracion internacional di LGBTQ+. Segun Vicky Arens, director di Cas di Cultura, naturalmente manera cu a bin ta haci pa bin cu programacion pa henter nos comunidad, fo’i mucha chikito, peuter, te cu hende cu limitacion y mucha di scol basico (cu Capuchon Cora diasabra awo), tambe tin espacio p’e comunidad LGBTQ+.
Esaki t’e di dos aña cu Cas di Cultura ta haciendo ‘Pride on Stage’, como tambe di tres aña cu ta poniendo atencion riba Pride en general y ta contento di ta haciendo dos actividad e aña aki expandiendo mas atencion y educacion riba e tema aki, p’asina haya mas aceptacion den comunidad, conforme cu SDG number 5 cu ta trata Igualdad di Genero entre otro.
Robert Anjie, colaborador y organisado den e team di Cas di Cultura pa loke t’e dos eventonan di Pride. Manera ya indica, e lo ta dia 9 y 10 di juni venidero.
Dia 9 di juni lo tin Pride Talks pa prome biaha, cual ta un actividad informativo y educativo pa henter e comunidad di Aruba, no solamente p’e comunidad LGBTQ+, pero un y tur por bin y haya mas informacion riba loke t’e comunidad.
Lo conta cu diferente experto riba veld, entre otro lo tin terapista, dokter y persona cu a pasa door di transicion tambe. Lo bay tin organisacion manera Famia Planea, Stichting Orguyo y HIAS cu lo papia riba diferente topico manera STI, Comming Out: kico e kiermen p’e persona y e mayornan. Informacion cu sa cu no ta accesibel pa tur hende. P’esey e actividad aki lo ta completamente gratis. E evento lo ta cuminsando pa 7:00 pm. Un y tur ta bonbini pa bin. Pa haya mas informacion riba tur e oradornan cu lo tin, tambe lo tin discusion di panel. Cualkier persona cu por tin pregunta of preocupacion, por haci esaki e anochi aki na Cas di Cultura.
Tambe lo bay tin “Pride on Stage” den Cas di Cultura pa di dos biaha, caminda cu e lo ta un anochi di celebracion, di inclusion, di diversificacion y igualdad, riba dia 10 di juni. Aki lo tin artista local un biaha mas riba escenario di Cas di Cultura, presentando diferente hit. Ta contando cu e banda Sincustic cu Jairo, cu lo deleita e publico cu diferente cancion.
Un biaha mas lo tin Drag Queens cu lo duna un tremendo presentacion, deleitando henter e comunidad pa loke t’e arte y cultura di haci e presentacionnan di Drag.
Invitacion ta bay pa pueblo di Aruba pa bin tur dos actividad, dia 9 y 10 di juni. Entrada pa dia 10 di juni ta 30 florin y ta obtenibel na Cas di Cultura mes. Bin celebra hunto cu e comunidad riba dia 9 di juni pa haya mas informacion pa loke t’e comunidad LGBTQIA+.
Pa mas detaye lesa TREMPAN.
