Un di e maximo cantantenan femenino di nos pais, Dhaddy Brokke, ta hospitalisa awe. E ta recuperando despues di tabata envolvi den un accidente di auto diasabra anochi. El a haya basta sla y aunke nada grave, dokter ta prefera want’e un dia interna pa observacion. Kier ta sigur cu no tin of lo no presenta complicacion despues.
Tabata diasabra anochi pa 7:00 pm cu a sosode un accidente riba e caminda di ex-Wan Boy Supermarket na Tanki Leendert net dilanti di Chalo Burger. Un solo persona a resulta herida, pa colmo ta e cantante Dhaddy Brokke. Un auto marca Audi a pega na candela.
Dhaddy Brokke, cu recientemente a cumpli 70 aña di edad ta un di e maximo cantantenan femenino di nos pais. El a bira popular den e banda Dedhalavie Combo di añanan 70 y despues tambe den e duo Dhaddy cu Tony. El a hasta produci algun disco cu canticanan dedica na mucha.
Brokke ta na Aruba pa motibo di enfermedad di un famia. El a bin pa tres siman, pero awo sin spera a hay’e envolvi den un accidente tambe.
“Ainda falta…mi dushi hendenan, cu boso den mi curason, mi ta sigui e lucha. Gradici na mi Dios cu a cubri su pret’i wowo un bes mas. Na tur esnan cu a yuda mi for di despues di e impacto, staff y personal di dr. Horacio E. Oduber Hospital cu a y ta haci tur posibel pa mi por sigui dilanti. Un abraso fuerte di mi curason pa cada un di boso curason”, asina Dhaddy Brokke a expresa, for di su cama den hospital.
