Un caso serio a tuma luga awe na un cas na Sero Blanco, caminda un persona bastante agresivo no kier a rasona cu esnan na cas. A pidi presencia di polis mirando cu e persona lo tabata tin un arma blanco den su poder.
Esaki a sosode den careda di 12:45PM, momento cu testigonan a tuma nota di un discucion formal tumando luga cu a bay completamente for di man. Segun e testigo ta conta, el a bin topa cu gritonan fuerte y un scenario basta peligroso tumando luga.
E persona aki tabata incontrolabel. Cu cuchiu den man el a cuminsa herida su mes. Despues a bay direcccion di su vehiculo, caminda el a bolbe purba haci su mes daño ora el a dal su cabes na e hood di e auto. A subi e auto y sali ta zwaai su auto tur cu tin, sin tene cuenta cu un criatura cu tabata eyfo. Por poco a destrui un otro vehiculo den su salida di e area.
Un rato despues, e homber a regresa sitio, caminda e tabata exigi, bou grito y yoramento, pa e mira su pareha. Esaki no a logra mirando cu net na e momento ey polis a presenta na sitio. Locual por a compronde na sitio, ta cu e pareha y su mama no ta desea su presencia na e cas.
A tuma nota tambe di ambulance, cu a atende e homber na sitio, pero un rato despues e situacion a bolbe bira tenso y e persona no kier a rasona. No a keda nada otro cu detene e homber aki y transport’e pa warda.
