Diasabra marduga, alrededor di 1:50 am, un turista a yega Barceló Beach Resort Aruba y notifica cu un homber desconoci p’e lo a purba di atrac’e. El a conta cu e atracado tabata di estatura cortico, cabes pelon y tabata bisti cu un T-shirt color blauw.
E intento di atraco a sosode na e beach band’i Barceló Aruba. E tipo a wanta e turista contra su boluntad. Despues di a fracasa den su atraco, e sospechoso a core bay den e hanchi entre Barceló Aruba y Hilton Aruba Beach Resort.
E turista, cu a yega na gritamento, ta hospedando na Barceló Aruba Beach Resort. A yama polis cu a bin tuma dato di e victima. El a confirma cu no a horta nada for di dje. El a lucha cu e atracado, cu a want’e contra su boluntad. Polis a patruya den henter e area pero no a topa cu ningun persona cu tabata cuadra cu e descripcion duna door di e victima.
Tipo di actonan criminal asina ta funesto pa nos turismo. Gobierno y sector priva ta inverti hopi fondo pa garantisa mas siguridad den area turistico, cu sistema moderno di camara, di siguridad fisico y extra presencia di polis. Ta spera cu pronto lo por yega na e persona aki cu tin intencion menos bon pa cu nos industria turistico.
