Ayera den ora di merdia por a tuma nota di algun material di DOW den cercania di e crusada di Palm Beach caminda ya pa un par di aña caba a bin ta anuncia cu lo bay construi un rotonde. Mester subraya cu cu pueblo henter a pidi incansablemente pa bin cu un solucion p’e crusada aki. Un cantidad di accidente a tuma luga akinan, envolviendo tanto nos localnan como tambe e turistanan cu ta bishita nos.
Na varios ocasion DOW a haya nan mes ta cera e crusada por completo pa evita desgracia ya cu, pa un motibo of otro, regulacion di velocidad tabata keda presenta problema na dicho crusada. Pues, ta practicamente tur dia un of mas accidente tabata tuma luga akinan.
Esaki lo por tabatin di haber cu ta pa basta tempo caba e luznan di trafico na e sitio no ta funcionando tampoco. Aña pasa na october, DOW a anuncia cu nan lo laga traha algun verkeersplateau den e area temporalmente. Esaki den un intento pa haci cu e fluho di trafico bay den un forma mas modera p’asina evita mas accidente.
Tur e biahanan cu a cera e crusada aki a pensa cu porfin lo bin cu adaptacion of solucion, pero nada a tuma luga y mas cu claro, pueblo a cuestiona dicon no a haci nada pa esaki durante pandemia, pues tabatin pleno oportunidad ora cu nos turismo tabata practicamente na cero.
Awo porfin a cuminsa cu e accionnan enberdad pa converti esaki den un rotonde. Pues, den e dianan binidero e crusada aki lo bay ta cera pa por realisa e trabounan cu lo bay percura pa un miho fluho di trafico y mas siguridad riba e camindanan tan frecuenta aki.
