Un caso cu sacudi e comunidad y, cu te dia di awe, ta topico delicado pa hopi hende cu a biba e tragedia aki di cerca.
Juan Junior Quant, miho conoci como Blauw, a comete un crimen cu poco biaha a yega di sosode riba nos isla. Cu un arma di candela, na nan residencia comun den Pavia, a los tres tiro riba su pareha cu consecuencia casi fatal. Esaki a tuma luga den luna di maart na aña 2011; pa ta exacto dia 27 di maart 2011. Riba e fecha ey, Blau tabata tin apenas 34 aña di edad.
E victima, Chaldira Vis a ricibi 3 impacto grave di bala cu a perfora su curpa. Un na su cachete, un na su garganta, y un ultimo den cabes. Tambe den informe por a lesa cu a purba sofoca e victima cu un saco di plastic riba su cabes mirando cu e arma a pega y e victima ainda tabata ta bida. A logra yega Hospital cu e victima caminda esfuerso maximo a tuma luga cu a logra scap’e di morto. Posteriormente a transporta e victima pa exterior caminda cu tambe tabatin mester di esfuerso pa salb’e. Despues di 2 luna den exterior, el a regresa; pero nunca mas manera e tabata antes.
Durante e detencion, tambe por recorda cu Juan Junior Blauw Quant a haci un intento di pone fin na su bida den e cel di warda di polis caminda e tabata deteni. Polis, a bin hay’e na tempo y trata mesora di reanim’e. A logra evita su morto y a transport’e pa hospital cu urgencia caminda el a keda interna pa algun siman den coma. Dia 28 di april, na momento cu el a recobra conocemento, a transporte directamente pa KIA pa asina cuminsa cu e debido interogacion.
Locual cu Blauw semper a keda para riba, ta cu e no ta corda kico a tuma luga e anochi di e crimen. E tempo ey e tabata empleado di WEB y despues di un actividad di compania, a sali direccion pa nan residencia na Pavia. Den careda di 8:00 pm e desgracia pasional aki a tuma luga.
Den luna di juli di e mesun aña, e acusado a aparece dilanti mesa berde caminda a pidi e castigo maximo di 15 aña pa su persona. Despues di 10 aña sinta tras di trali, awo a yega e momento cu e ta bay recupera su libertad. Den e dianan venidero e lo ta un homber liber y cu a paga su debe cu sociedad.
Pa locual ta su tempo di encarcelamento, Blauw tabata un prizonero ehemplar cu a dedica su mes na tur tipo di curso y estudio pa asina supera su mes durante tur e añanan cu e tabata cera. Te cu awe ainda e ta mantene di no ta corda nada di loke a pasa e anochi ey na Pavia.
No ta conoci ainda con Juan Junior Blauw Quant lo incorpora su mes bek den comunidad, pero loke ta sigur ta cu e victima a vocifera su angustia y trauma di djis e pensamento cu su agresor lo ta liber y cla pa sigui su bida. El a ricibi for di ministerio publico un carta cu ta notific’e di e fin di e sentencion di su agresor. Actualmente Chaldira Vis ta residencia na Hulanda caminda e ta ricibi e tratamento medico cu e mester. E ta biba hunto cu yiu homber di dje y Quant cu tempo di e crimen tabata un menor di edad.
