E ta un berdadero ehempel den comunidad; E tabata fiel na politica, a dedica hopi na deporte, na musica y folklore, na comercio, a duna asina tanto bek na comunidad y sin conta su rol como un tata di famia. Awe marduga Mario Alcaldo Croes – miho conoci como Aiky Croes, a bay sosega den brasa di Señor. El a bay laga atras su señora Elsa y su yiunan Shahaira y Edward.
Pa algun aña e tabata sufri di diabetis, cu a pone cu cada pasa tanto tempo e tabata pasa dor di retonan cu su salud. Den e proceso el a perde pia, pero asina mes a keda cu e mesun forsa pa sigui lucha contra e enfermedad. Na final, e enfermedad a gana e guera conta dje y awe marduga e no tabata por mas y a entrega.
Aiky Croes, desde principio y fundacion di e partido politico MEP di su ruman Betico Croes, e semper tabata encarga cu set-up y desarma reunionnan publico den tur bario. E tabata core rond cu un trailer yena di bari, biga pa mara wayanan di luz y piedra pa hinca den e barinan pa por wanta e palonan di luz. Tambe e tabata carga y instala e escenario riba cua Betico Croes tabata para pa tira su discursonan. Aiky tabata conoci pa hiba campaña agresivo pa MEP.
Separa di politica, Aiky Croes tabata un fiel sostenedo di futbol, specificamente na e club SV Estrella di Santa Cruz. El a fungi como Presidente di e club pa hopi aña. P’e su bida tabata futbol y no tabata perde un wega. No solamente e tabatin un pasion pa e deporte mes, sino tambe pa e club di Santa Cruz en particular, pa cual e tabata duna su alma y curpa pa yuda den tur actividad pa hiba e club padilanti, pa por recauda fondo y atrae mas tanto publico posibel na stadion ora di wega.
Den musica tambe Aiky tabata masha activo, pa cual e tabata tocado di tambu den Grupo di Betico pa mas di 50 aña largo. Ta bon pa resalta cu Grupo di Betico a inicia for di tempo cu Betico Croes mes tabata na bida, pa cual tabata core paranda di Aña Nobo cantando Dande den tur bario. Cu tempo, despues cu e generacion nobo di famia Croes a tuma over, a haci e grupo hopi mas comercial y cu enfoke riba produccion y presentacionnan. Cu tur e cambionan y introduccion di tecnologia moderno den e grupo, asina mes Aiky a keda fiel cu su tambu!
Den comercio, Aiky Croes pa hopi aña tabata un dealer di combustibel. El a inicia su carera den Lago Colony na aña 1960, como empleado di e stacion di gasolin di su tata Francisco C. Croes y por ultimo como dealer di e stacion di gasolin na Savaneta, awor conoci como CITGO Savaneta. Un carera di 60 aña cu seguramente ta di admira. El a traha hunto cu Elva Croes-Tromp — miho conoci como Elsa Croes casa di Aiky Croes. E ultimo a traha 53 aña na e dealership di famia Croes, el a cuminsa su carera como empleada y despues como accountant di e dealership.
Pa no keda falta e amor na nos cultura y carnaval, pa hopi aña largo, Aiky Croes tabatin su mesun grupo di carnaval yama “Aiky’s Crazy team” den cual nan tabata participa cu un tema comico den paradanan di carnaval. Casi tur aña tabata gana premio, specificamente como “Grupo Comico” di carnaval.
Su fayecimento awe sigur ta un perdida grandi pa famia Croes riba su mes, pa su señora y yiunan, nietonan, pa partido MEP, pa e compania FMSA cu ta maneha e stacionnan di combustibel rond di nos isla, pa carnaval, pa SV Estrella y futbol en general, pa Grupo di Betico y pa henter nos comunidad. Poco hende sa ta asina ehemplar awendia ainda, dunando tanto di nan mes pa nan famia, pa comercio, deporte y cutura di nos pais.
Cu Aiky Croes sosega na paz. Hopi forsa na su famia y amigonan den e momentonan dificil aki. Cu nos bon Dios por drama su bendicion y brinda sosten den boso tristesa.