Un rato pasa, Maria Leoncita Arends a recobra su libertad den e caso di Avestruz. E tabata cera desde diamars dia 13 di april ultimo, ora cu Landsrecherche a deten’e na su cas situa na Sero Blanco. Esey a bin dos dia despues cu a detene su yiu muhe, Rebecca Richardson, na aeropuerto. Na tur Leoncita a permanece 46 dia den man di husticia, encarcela entre ward’i polis y KIA. Su libertad ta condiciona cu e no por topa cu otro sospechosonan y mester sigui coopera cu Ministerio Publico.
Desde dia 11 di april ultimo, diesdos sospechoso a wordo deteni den e investigacion Avestrus, di cual ocho ya ta den libertad. Ta referi na sospechosonan
• Rebecca Richardson dia 11 di april
• Jeff Franken dia 12 di april
• Maria Leoncita Arends dia 13 di april
• Ninosca Nuñez dia 19 di april
• Gaby Werleman dia 19 di april
• Franklin Abath dia 28 di april
• Pieter Susebeek dia 5 di mei
• Freddy Every dia 11 di mei
• Mary Hsing dia 19 di mei
• Claudia Sevinger dia 26 di mei
• Benny Sevinger dia 26 di mei
Mester menciona cu e sospechosonan no por tin ningun sorto di contacto cu Carlo Mansur, Ewald Biemans y Mary Winterdal. Tampoco por tin contacto entre e sospechosonan tampoco!
E CASO AVESTRUZ
Ministerio Publico a informa dia 2 di october 2019, dia cu a haci e huiszoekingnan, cu Landsrecherche hunto cu hues-comisario y den cooperacion cu Cuerpo Policial di Aruba, a tene entrada hudicial na diferente luga. E entradanan aki a tuma luga den cuadro di un investigacion penal di Landsrecherche pa posibel delitonan di corupcion y otro hechonan castigabel posiblemente cometi relaciona cu otorgamento di terenonan di gobierno.
Mas concretamente: E investigacion ta dirigi riba e pregunta si un of mas compania a obtene a base robes (un opcion riba) derechonan di erfpacht di terenonan di pais Aruba den e añanan 2009 te 2017. Ademas ta investiga e rol di ex-minister Benny Sevinger den esaki.
