Diahuebs a tuma luga un charla riba e codigo di proteccion contra abuso di mucha y con esaki
ta hancra den ley, den ki forma e dunadonan di cuido por meld y notifica di un abuso di mucha.
E academico, mr. dr. Jayburtt Dijkhoff, hefe di Kwaliteits Instituut Gezondheidszorg, a sa di
duna e charla aki den un sesion na J.F. Kennedy Learning Center na un total di 30 persona y
ainda tin 20 persona mas cu ta riba un lista di espera pa por atende mas sesion riba e topico
aki.
Por lo general e charla a bay hopi bon, a pesar di ta un materia complica, mirando cu Aruba su
cuadro legal ta diferente cu e cuadro Hulandes. Ainda mas e codigo di proteccion ta exigi hopi
di e dunado di cuido.
E academico ta sigui splica cu tabata trata aki di un sesion di dos ora y mey completo, cu tur e
informacion necesario con e situacion ta regla na Aruba, na ki momento un dunado di cuido
mester notifica un caso di abuso y con esaki por bay den cuadro legal cu e dunado di cuido no
por bay den problema pa motibo cu secresia medico y e codigo di proteccion tin un relacion
hopi estricto na Aruba.
A elabora riba esaki completamente den un sesion basta amplio. Aworaki a cuminsa cu un fase
nobo na Aruba cu a bin cu mas ley nobo pa e proteccion di mucha. E acogida tabata fantastico.
Hendenan riba veld ta hopi interesa y serio pa por sigui traha na proteccion di mucha y tin cu
sigui cu e discusion y sigui traha riba e normanan aki tambe na Aruba, el a termina bisando.
