Cu e Plan di Termino Largo 2019-2028 ta garantisa financieramente cu den e añanan venidero por haci uzo di Wardacosta Caribe Area Caribense. Wardacosta Caribe Caribense ta dispone te cu 2028 di en total € 168 miyon, destina pa reemplaso di ekipo. E cuater Paisnan den Reino ta percura conhuntamente pa cubri e presupuesto financieramente. Esey tin para den e Acuerdonan di gobernacion, cu a keda trata awe den Conseho di Minister di Reino hunto cu e Plan di Termino Largo (LTP) 2019-2028 di Wardacosta Caribe. Minister Ank Bijleveld-Schouten (Defensa) a entrega e documentonan awe na parlamento Hulandes.
Wardacosta Caribe ta existi desde 1996. E ta un acuerdo di cooperacion entre tur e paisnan den Reino. Hulanda (69%), Aruba (11%), Corsou (16%) y Sint Maarten (4%) ta aporta proporcionalmente den e gastonan. E contribucion di Hulanda ta procedente di e presupuesto di Defensa.
Por yama e acuerdo di cooperacion sin mas exitoso. Como agente di ley maritimo, Wardacosta Caribe ta prueba su mes un conexion indispensabel den e parti Caribense di Reino.
Wardacosta Caribe no ta enfoca solamente riba vigilancia di e fronteranan maritimo exterior. E organisacion ta hunga un papel importante tambe den combatimento di crimen cu ta crusa frontera y tin tareanan riba tereno di supervision, search and rescue y combatimento di desaster.
Pa por ehecuta e tareanan aki bon e añanan venidero tambe, mester reemplasa e ekiponan periodicamente. Cu e LTP, Defensa ta duna un bista den esaki. Di e 168 miyon, 159,9 miyon ta bay pa inversionnan relaciona cu reemplaso di ekipo. E montante cu resta ta pa gastonan di explotacion. Defensa, como administrado di Wardacosta Caribe, ta haya esencial cu desplega operacional di Wardacosta Caribe ta keda garantisa. Sigur den e epoca actual, den cua narcocriminalidad y clima extremo ta aumentando. Banda di esey e region tin di haber cu un Venezuela instabil, contrabanda di hende y problematica di migracion.
