Manera nos di 24ora.com a informa ya caba for di marduga, pa mas o menos 3:00 am awe a bati alarma pa dos boto na candela na e pier di Cura Cabay. Den e oranan ey tanto polis y cuerpo di bombero a acudi na sitio. A logra paga e candela y a start un investigacion mesora pa purba haya sa ta ken a comete e acto condenabel aki. Mas cu claro, awe 24ora.com a acudi na sitio p’asina haya mas informacion di e suceso aki. Ta di subraya cu segun informe, e dos botonana aki no lo tabata para banda di otro y ta practicamente di e mesun doño. Pues asina mester cuestiona kico tabata e motibo tras di e echo aki.
Na sitio por a tuma nota cu practicamente no a resta nada di e botonan. Robert Laveist, e doño di un dje botonan a bin pa dilanti pa vocifera su punto di bista riba e situacion aki. Laveist tabata doño di e otro boto cu tambe tabata cendi na candela, pero ta net poco tempo pasa a pasa esaki over pa un amigo di dje. Laveist a bisa cu e ta lamenta locual a sosode ya cu e no ta spera cu algo asina lo sosode ya cu e no ta envolvi den ningun tipo di “baho mundo” y no tin debe cu ningun hende. “E cos aki simplemente ta bini di un hende simplemente envidioso of egoista of tin rabia di algo.
Na su turno, Ruben Willems, kende ta encarga cu maneho di e pier a bisa cu nan a hala e otro boto cerca di e pier pa cende esaki tambe na candela y esaki tambe a resulta completamente destrui. Ta lamenta cu esaki a sosode ya cu ta hende cu ta traha duro dia aden y dia afo y pa awe marduga haya nan mes den un situacion asina aki. Na sitio a bisa tambe cu e hendenan cu tin boto eynan ta cansa di e vandalismo cu ta tumando luga den e ultimo tempo y ta pidi gobierno pa yuda nan cera e area pa evita e tipo di cos aki.
