Como parti di e vision y maneho di Ministro di Asunto Social y Labor, Sr. Glenbert Croes BA, a pone prioridad pa identifica gruponan den nos comunidad cu ta confrontando retonan social severo. Inmediatamente y conhuntamente cu Departamento di Asunto Social y cu tur socio riba e tereno social a cuminsa traha riba un plan di accion pa enfrenta y alivia e crisis aki.
Un parti importante di e strategia cu a keda delinea ta cu e plan lo mester ta di indole curativo y tambe preventivo pa asina evita cu e grupo cu ta ser afecta sigui crece.
E grupo cu mas ta ser afecta den e crisis social ta mucha y hobennan cu por confronta situacionnan di abuso. E tipo di abusonan aki no ta afecta mucha y hobennan so pero tambe adultonan en especial hende muhe y nos grandinan. Tambe lo bay tene cuenta cu otro gruponan cu por confronta retonan social manera personanan cu limitacion.
E plan di accion cu a surgi di e proyecto di Sociaal Crisisplan (SCP) ta traha ariba 3 nivel, esta esun legislativo, maneho (a termino corto y a largo plaso) y ehecucion.
Esaki ta exigi un cooperacion y coordinacion entre tur e socionan manera departamentonan di Gobierno pero tambe fundacionnan y otro instancianan activo riba e tereno social. Unabes cu e fondo presupuestario di SCP a keda aproba den Parlamento na fin di augustus ultimo, a cuminsa cu e parti organisatorio pa ehecucion di e plan. Despues di tur e trabounan intensivo di legislacion y coordinacion, awor ta preparando pa inicia e parti di ehecucion di e plan di accion di SCP.
Algun proyecto di e crisis plan social ta:
Ta bezig pa scoge un sistema di registracion di famianan vulnerabel aki na Aruba pa asina por actua mas trempan. Den esaki ta bastante leu.
Lo bin hunto cu e diferente scolnan aki na Aruba pa traha na mehora e situacion social na scol y na cas.
Ta trahando pa baha e listanan di espera di Directie Voogdijraad, Bureau Sostenemi y Departamento di Asuntonan Social.
Ta trahando pa bin cu un campaña di comunicacion tocante e crisis social.
Den cada bario Stichting Wit Gele Kruis lo bay duna sosten na e famia vulnerabel ora un baby nace.
Ta bezig ta ampliando posibilidad pa atende y guia mas mucha y hoben na diferente centro di guia.
Lo cuminsa un campaña di con pa cria bo yiu na luna di november 2018.
Ta atendiendo mas hoben cu problema psikiatrico y cu problema den conducta.
Na januari 2019 lo habri na Centro di Cuido na San Nicolas un luga pa atende hoben y muchanan cu necesidadnan special.
Lo drecha e sistema di registra hoben cu ta keda sin presenta na scol.
Lo percura pa haya mas trahado social den e barionan aki na Aruba.
Lo traha mas hunto riba tereno social, hudicial, enseñansa y cu bienestar publico pa por atende e retonan social na un miho forma.
Lo sostene mayornan miho den nan tarea con pa cria nan yiu door di ofrece diferente tayer y door di habri un centro pa famia destina pa guia mayornan.
Un parti importante cu kier resalta ta e compromiso di tur instancia cu a sa di duna prioridad na e proyecto aki. Como parti di e proyecto di crisis plan social, e crea un logo pa e comunidad por asocia e accionnan y esfuersonan pa atende cu e crisis social entre e diferente gruponan vulnerabel den nos comunidad. E logo tin su significacion y simbolismo pa dune contenido y inspiracion.
E diseño di e strea forma pa cuatro persona cu ta tene man ta simbolisa e union y cooperacion. Ta tarea di tur instancia y comunidad en general, den union y cooperacion, pa enfrenta e retonan y asina por percura pa e paz pa nos muchanan, hobennan (y nan famia), pa hende muhe, nos grandinan y tur otro victima di abuso.
E logo ta forma un strea cu ta igual na e strea cu ta simbolo nacional riba nos bandera.
E strea grandi ta simbolisa un compas y ta esun cu ta wordo forma door di cuatro persona cu ta tene man. Esaki ta pa simbolisa e direccion corecto cu mester tuma pa alcansa e meta cu ta pa recupera e trankilidad y inocencia den nos comunidad.
E strea blanco crea parti paden di e logo ta simbolisa e paz, puresa, inocencia y trankilidad cu nos kier yega na dje pa tur esnan afecta pa e crisis social.
Por nota colornan di e cuatro figuranan cu ta simbolisa cuatro persona cu ta tene man den e logo, cual cada color ta representa aspectonan importante di e meta di e proyecto
sociaal crisisplan. E significacion di cada color ta lo siguiente:
– E color ros magenta ta representa harmonia, amor, compasion, cooperacion y sobre todo respet propio.
– E color geel ta representa positivismo, claridad y speransa.
– E color berde ta representa renovacion, crecemento y siguridad pa e victimanan di abuso.
– E color aqua blauw ta representa e sabiduria y balansa emocional.
– E strea blanco meymey manera menciona caba ta representa e paz, puresa y inocencia cu nos kier yega na dje.
Pa mas informacion of pregunta tocante e desaroyo di e Sociaal Crisisplan, por tuma contacto na telefon 528-1100 ext. 189 of like nos pagina di facebook ‘Sociaal Crisisplan’ y keda informa di tur desaroyo.
