Seccion di Investigacion y Documentacion (SID) di DCA ta informa tocante e workshop di Diana Antonette cu ta tuma luga na ‘Plaza Libertador Betico Croes’ den e parti abou, ta riba e fechanan siguiente : 6 di juni, 13 di juni, 20 juni y 27 di juni 2019, e orario lo ta di 7.00pm pa 8.30 pm.
Esaki ta un recordatorio pa tur lider of coreografo di grupo di baile cu ta desea di participa na e workshop menciona. Workshop ta completamente gratis pa dicho grupo asisiti. Pero si nos ta desea pa cada grupo cu ta desea di forma parti na e Plataforma Cultural den Sector Turistico pa confirma participacion. Si por confirma e peticion menciona, por haci esaki duranti participacion na e workshop. Tocante e Proyecto por haya e informacion abou di loke e ta encera.
Tambe nos kier a enfatisa na cada un lider di grupo pa asisti na tur e fechanan menciona, e ta importante y ta forma parti di e exigencianan di hotel pa asina tur grupo di baile (di folklore) ta riba e mesun liña.
Contenido di e proyecto
Mirando cu nos tin un cantidad di hotelnan aki na Aruba, mester crea e posibilidad cu na momento nos bishitantenan yega un hotel nan por disfruta di nos musica folklore, y asina experencia di biaha cu enberdad nan a yega e perla den Caribe cu yama Aruba. Esaki ta conta tambe pa e prome puntonan di yegada caminda e turista mester por experencia un caluroso bon bini. Alabes DCA ta di opinion cu un anochi cultural mester forma parti di e producto cu un hotel ta ofrece na su bishitante, pa asina nan por haya un toke adicional na loke Aruba ta conoci pe, esta solo, santo blanco y su lama. Pa por crea e desaroyo tan desea pa nos agrupacionnan di Musica Folklore, Grupo di Baile y Caha di Orgel, DCA a inventarisa , investiga y presenta un plan concreto con pa realisa esaki integralmente cu diferente stake olders.
Meta di Proyecto
Meta di e proyecto ta pa bin cu un plataforma cu lo crea desaroyo duradero pa nos Agrupacionnan di Musica Folklore, Grupo di Baile y Caha di Orgel den e sector turistico. Na mes momento nos ta yuda mantene nos folklore bibo y por cuminsa crea e condicionnan pa por percura cu e presentacionnan di musica folkore, grupo di baile y caha di orgel den e sector turistico lo por ta di un nivel halto y profesional. Mester percura pa un situacion caminda tur grupo di enfoke ta sali beneficioso. Hotelnan, Aeropuerto y Terminal di Crusero ta amplia nan producto elevando e experiencia di nan bishitante y mediante di e plataforma por logra duna balor na nos artistanan local, dor di crea e posibilidad pa nan tin presentacionnan structuralmente bou condicionnan favorabel.
Despues di e workshop aki lo tin algun reunionan cu mester tuma lugar ainda pa nos por concretisa e plataforma structura na un manera desea pa nos agrupacionan di musica y baile folklore.
