E siman aki gobierno a anuncia un proyecto pa embeyecemento di trapi na Rodgers Beach cu fondonan publico y cu e meta di mehora producto Aruba, poniendo enfasis riba e atencion cu ta duna na e region pariba di brug. Sinembargo, un ciudadano ta puntra si mes, ki ta bal haci algo bunita, si nos mes ta stroba mañan pa otro disfruta di dje.
Bishitante di e mural na San Nicolas a topa diasabra cu un situacion un poco indesea. Un famia local hibando turista pa conoce e area di promenade y mural den Caya Grandi a haya nan stroba y tambe poco borgonsa. E motivo ta cu algun persona a dicidi di staciona nan auto net dilanti di algun di e muralnan. Esaki a stroba cu publico por a admira e mural den su totalidad, pero tambe cu por a saca potret di dje.
E persona a comenta cu si tabata trata di un dia cu tin evento grandi pariba, manera un parada di Carnaval of un festival den caya, e lo por a compronde cu espacio di parkeo ta masha limita. Sinembargo esaki tabata un diasabra mainta caminda caya principal di San Nicolas, fuera di grupo di turista aki aya, tabata bashi. Asina mes a haya bon pa para riba trottoir y dilanti di un mural.
Y no tabata un, pero por lo menos dos e casonan asina cu solamente e grupo aki por a tuma nota di dje na e momento ey. A haya lamentabel cu ta invita turista pa bay conoce algo, pa despues yega eynan, tanto nan tin cu ripara comportacion asina asocial. Riba dje, tin e aspecto cu ta staciona riba trottoir, algo cu legalmente no ta permiti y ta stroba e acceso na peatonnan.
A tuma contacto cu representante di Artisa/Art Fair cu ta e motor tras di e muralnan aki cu a pone Aruba haya atencion for di e publicacionnan mas prestigioso na mundo pa conoce nan reaccion riba esaki. Pa sa si e ta algo cu ta sosode frecuente y si ta stroba nan den nan operacion di tours pa cual e turista ta paga. Sinembargo, no a haya un contesta riba nos peticion pa reaccion.
Ta spera cu e habitante of bishitante cu tin e custumber di para nan auto di e forma aki, compronde cu na prome luga, esey no ta lo corecto, y dos, cu ta afecta e promocion di caya grandi di San Nicolas como un destino turistico riba su mes. Por ta mester cana un tiki mas, pero bo tin e satisfaccion di sa cu bo no a stroba otro un persona di admira e muralnan aki y di saca un potret cu cual e ta bay promove Aruba a traves di social media.
