Gerschwin Lee, director di San Antonio College, tabata contento durante e momento di entrega di lista di e graduadonan di e MAVO aki na Santa Cruz pa aña 2020. “E tabata un aña yen di reto pero nos a cumins’e bon ya cu for di prome instante tabata mustra cu 94% di e candidatonan di examen tin e puntuacion necesario pa gradua,” el a bisa.
Tur e scolnan di MAVO tabata creativo e aña’ki pa anuncia e studiantenan cu a logra gradua den prome tanda. Loke mayoria scol tabatin en comun ta cu e muchanan a yega scol cu auto dorna, cu nan mayornan y bou pitamento. Na San Antonio College tabatin orario pa cada klas presenta y momento cu e hobennan tabata eyriba, tabata kita e papel cu tabatin e borchi cu e nombernan tapa. Bou grito di alegria si e studiante a gradua, y cu pitamento di auto ta ricibi e noticia.
Den e prome tanda na final 91% a gradua. “Apesar di tur contratiempo hopi a gradua.” Ainda tin chens pa algun mas gradua den e di dos tanda.
El a bisa cu hunto cu SKOA, DVG y Departamento Enseñansa a traha pa tur cos cana bon na momento di examen. Esaki ta logra, el a bisa, ora cu tin bon “team work”. Awor ta spera kico nan hefenan ta indica pa e siguiente aña cu ta cuminsa na augustus.
