Den e caso di zonamento di alarma di emergencia cu WEB Aruba N.V. a tene dia 5 di maart 2024, ta comprendibel cu e habitantenan por tawatin incertidumbre. Pa e motibo ey a informa nan di manera custumbra pa medio di WEB Aruba N.V. su paginanan social. Sinembargo, contrario na loke 24ora a publica, riba e echo di a laga zona e alarma di emergencia, WEB Aruba N.V. no ta considera esaki como un simulacro.
Ademas a contesta y splica e habitantenan cu tawatin ‘comentario’ riba e publicacion riba WEB Aruba N.V. su paginanan social. Como cu no a exigi ningun accion di parti di habitantenan pa cu testmento di e alarma, no a informa pa medio di carta den brievenbus. Den caso cu ta rekeri cooperacion of accion specifico di habitante, nan por ta sigura cu lo informa nan directamente. Pa lo cual ta si ta necesario pa tin e hindervergunning special pa testmento di alarma di emergencia, WEB Aruba N.V. ta informa di ta den consulta cu DWJZ.
WEB Aruba N.V. a tuma nota di e publicacion riba 24ora.com dia 6 di maart 2024, ‘Grupo di Habitante rabia: WEB no a envolve e bario den simulacro’ y ta informa lo siguiente. E zonamento di alarma den WEB Aruba N.V. no tawatin nada di haber cu un simulacro, pero ta forma parti di optimalisacion constante di WEB Aruba N.V. su maneho den caso di emergencia y/of calamidad.
Den un industria manera esun di WEB Aruba N.V., Safety & Security ta e aspectonan hopi importante. Den e cuadro ey constantemente ta conscientisa e empleado- y contratistanan cu ta labora na WEB Aruba N.V. Ta haci esaki door di duna diferente presentacion, entre otro tocante evacuacion den caso di emergencia y/of calamidad. Ademas ta actualisa y optimalisa e proceduranan di emergencia, di cual e testmento di e alarma ta un di nan.
