For di algun tempo tin varios keho ta drenta di vuelonan cu retraso debi na control fuerte di Inmigracion na Aeropuerto Internacional Reina Beatrix. Tur dia pesonal di Inmigracion ta manda varios persona bek riba e mesun vuelo cu nan ta yega Aruba. No ta laga nan ni drenta nos isla, sino na frontera mes ta manda nan bek. Claro, no ta tur hende, sino un grupo cu no ta cumpli.
“No cumpli”, ta referi na e personanan cu mester tin minimo $150 dollar pa cada dia cu nan ta riba nos isla y mester tin un reservacion di hotel. E reservacion mester ta paga y no reserva pa paga ora yega hotel. E controlnan aki mayoria biaha ta tuma luga riba e “risicovluchten”, cual mayoria di nan vuelonan for di LATAM (Latino America). E control ta fuerte riba e vuelonan aki pa evita cu personanan cu no tin cen ta bin Aruba pa traha di un forma ilegal y pa keda un periodo mas cu realmente nan a bin p’e. Bo no ta haya tipo di control asina riba vuelonan Mericano y tampoco Canades.
E control fuerte tin su beneficio, pero tambe tin su consecuencia. Si mira di parti Aeropuerto mes, ta haci hopi esfuerso pa engrandece e mercado LATAM. A logra varios vuelo adicional pa Aruba, por ehempel cu vuelonan inaugural for di Peru, cu lo sirbi pa engrandece e mercado di CHile y Argentina pero tambe Brazil.
E turistanan di Brazil ta un di esunnan cu ta gasta mas placa pa dia, como $1000 mas o menos. Pero tambe for di vuelonan di Colombia, Wingo ta keda amplia su vuelonan for di Bogota, Medellin y Cali y awo Avianca. Avianca ta bulando tur dia for di Bogota pa Aruba y desde juli, cu cuater vuelo semanal for di Medellin.
Di un banda ta haci esfuerso y di e otro banda ta pusha cu control riba e pasaheronan. Mandamento di pasaheronan bek ta causa cu e vuelonan ta bay cu retraso, pasobra riba e mesun avion cu nan a bin, tin cu manda nan bek. Pa cual, e pasaheronan cu ta bayendo riba e vuelo t’esun cu ta ricibi e efecto negativo y tin ora cu riesgo pa perde nan conexion sea na Bogota of Panama. Segun Andrew Hoo, director interino di Inmigracion, tur cos ta canando bon di nan banda y e control ta necesario!
