Aruba Lions Club ta invita pueblo en general pa participa den un feria di salud cu lo tuma luga diasabra 21 di november na Colegio San Augustin na San Nicolas, di 9:00 di mainta pa 1:00 di atardi.
Presidente di Aruba Lions Club, Gerardo Figaroa, a haci un yamada na comunidad pa bin probecha e diferente chekeonan di salud cu lo ta disponibel durante e actividad.
Figaroa a conseha e hendenan pa no bin demasiado trempan, specialmente esnan cu tin intencion di haci un chekeo di sanger. El a splica cu despues di e chekeo participante por pasa na mesa di registracion pa haya algo di come y bebe.
Ademas, e organisacion ta pidi pa mayornan acompaña nan yiu nan durante e feria y pa no laga muchanan bin nan so. Figaroa a haci un yamada tambe pa tur participante tin pasenshi, pasobra tur hende lo haya su turno y no tin necesidad di forma aglomeracion.
Segun Figaroa, Aruba Lions Club ta spera un gran cantidad di participante y ta mira e actividad como un oportunidad pa comunidad pasa un dia agradabel hunto, mientras nan dedica atencion na nan salud.



Aruba Vision Center ta ofrece chekeo di presion di wowo
Aruba Vision Center tambe lo participa den e feria di salud. Joseph Raeven, representante di e centro, a confirma cu nan lo ofrece servicio di chekeo di presion di wowo durante e actividad.
Ademas di e chekeo, e ekipo lo duna un splicacion cortico tocante di kico presion di wowo ta y e gravedad cu e condicion aki por tin.
Raeven a indica tambe cu Aruba Vision Center lo comparti informacion specialmente cu hende di 60 aña y mas, tocante e tarifanan special cu e centro tin disponibel pa nan ora nan bishita Aruba Vision Center.
E feria di salud lo tuma luga diasabra 21 di november na Colegio San Augustin na San Nicolas, di 9:00 di mainta pa 1:00 di atardi.



