Aruba ta e unico pais den Reino cu ainda no tin un Ombudsman. Den esaki ta bini un cambio pronto. Despues cu na aña 20220 parlamento a aproba den forma unanime e ley di ombudsman, awe finalmente e ta bira un realidad den practica.
E miembro di fraccion di MEP den parlamento, Darlaine Guedez-Erasmus, a expresa su satisfaccion di por a lesa e aviso di solicitud. “Despues di a reuni pa bini cu cambionan proponi, awo nos por mira cu Ombudsman ta bay bira un realidad.”
Despues cu den luna di mei a finalisa cu e profielschets di e Ombudsman, den e prome siman di e luna aki a publica e vacatura. Tur persona interesa pa ocupa e puesto aki, tin te cu e fecha 29 di september awo via di e email: [email protected]
“Si tur cos bay bon, pa fin di aña Aruba lo tin un Ombudsman, e defensor di pueblo.”
Guedez a bisa cu e motibo cu e t’asina contento cu realisacion di Ombudsman, cu ta e instituto unda pueblo por yega na dje momento cu no ta di acuerdo cu algo. “E ta pa pueblo y ta gratis. Tur hende por yega, e ta duna oido y ta hopi priva. Tambe e lo ta un Kinder Ombudsman pa atende cu temanan di mucha,” e parlamentario a bisa.
