Adictonan ambulante na final di dia tambe ta hende, nan tambe merece un trato y nan tambe tin derecho di bida y Minister di Salubridad, Dangui Oduber a mustra cu gobierno kier brinda e hendenan aki un facilidad caminda nan por haya facilidad pa tuma un baño, haya algo di come, haya un cariño, haya e servicio necesario y pa wak si por trata di yuda e grupo aki.
Minister Oduber a mustra cu esaki ta un problema hopi grandi na e momentonan aki, un problema cu ta afecta hopi famia na Aruba, caminda por mira mas y mas e tendencia caminda hobennan na un edad relativamente jong di 12, 14 aña cu ta bira adicto, pues ta trata di un problema hopi serio cu gobierno a atendiendo cune.
Gobierno tin e boluntad y tin e determinacion pa bin c’un cambio y hunto cu stakeholders y hunto cu fundacionnan cu tin e curazon pa e trabou, e mandatario ta sigui cu su gobierno ta determina pa bin c’un cambio ya cu pa hopi aña a neglisha e problema aki y e actual gobierno si ta bay duna e asunto aki e atencion necesario cu e merece.
Pa loke ta e asunto di legalisacion di cannabis Minister Oduber a mustra cu gobierno tabata hopi categorico riba e tema aki y a mustra cu durante tratamento di presupuesto den Parlamento, su persona a mustra bon cla cu gobierno ta na fabor di cannabis medicinal pero ta contra di cannabis recreacional y esey ta keda e posicion di gobierno di Aruba y esaki ta para den a programa cu partidonan di coalicion a firma cu gobierno aki ta bay explora e posibilidad di cannabis medicinal y no recreacional y e minister a confirma cu esey ta su posicion tambe riba e asunto aki.
“Nos a forma un comision y e comision aki a presenta diferente sugerencia y nos ta den e proceso pa introduci cannabis medicinal den tres fase y dentro di poco lo tene un conferencia di prensa caminda lo anuncia kico ta e decision cu gobierno a tuma y con ta bay encaminda e proceso aki y dentro di poco nos lo inicia e proceso pa legalisa cannabis medicinal pa yuda esunnan cu tin depresion, tin epilepsia, ta diabetico y cu tin cancer, lo por haya e posibilidad pa den un forma legal haya e productonan aki.
Ora nos bisa cannabis medicinal nos ta interpreta esaki ora c’un persona ta haci uzo di cannabis medicinal ta ora un pashent ta sufri di epilepsia of depresion lo por tin acceso legal na e productonan aki.
Esaki por via di su dokter di cas, cu ta un discusion cu nos tin cu hiba despues pasobra ora ta papia di cambio di ley, mester cambia e ley aki ya cu nos tin un ‘opiumwetgeving’ cu mester wordo cambia cu ta un proceso un tiki mas largo pasobra tin e azeta di cannabis, tin e cvt oil cu no tin un gehalte hopi halto di tst y e cannabis oil aki por wordo uza medicinalmente pa personanan cu ta sufri di stress, cu ta sufri di depresion, cu ta diabetico, cu ta sufri di cosnan cu no tin un impacto asina grandi riba nan salud.
Pero tin e otro cannabis oil cu tin un tst gehalte hopi mas halto, un dosis hopi mas halto y esaki ta wordo uza por ehempel pa pashentnan cu tin cancer anto pa nos introduci esey lo mester cambia e ley.
E cvt oil cu mi ta papia di dje tin un gehalte hopi abou di tst lo wordo aangemerkt cu un voedingssuplement, cu ta un suplemente anto esaki lo bay wordo poni disponibel, esaki no ta legal na Aruba na e momentonan aki, ya cu bo no por bay un botica of un supermercado y cumpra un cvt oil.
Na Hulanda esaki ta posibel y na Bonaire esaki ta posibel pero na Aruba no ta posibel ainda y dentro di poco gobierno lo anuncia kico ta e proceso cu nos ta bay encamina pa haci esaki accesibel pa comunidad,” Minister Dangui Oduber a declara.
E mandatario a sigui mustra cu pa loke ta plantacion di cannabis, cu esaki por bira un pilar economico, el a mustra cu esaki ta discusionnan gobierno ainda ta hibando pero cu e decision cu gobierno actual a tuma, ta pa e cannabis medicinal.
Minister Oduber a mustra cu e no por papia riba e parti di plantacion di cannabis ya cu esey no ta cay bou di su responsabilidad.
