Minister encarga cu Lotto pa deporte Dangui Oduber den un conferencia diaranson atardi a splica e motibonan pakico el a dicidi di pidi e miembronan di Hunta di Supervision pa pone puesto na disposicion di su persona.
E mandatario a splica cu e tabatin 4 motibo crucial pa cual el a dicidi di pidi e grupo aki pa entrega nan retiro voluntariamente.
Na prome luga, ta normal cu ora cu tin cambio di Gobierno pa haci cambio den e directivanan di e diferente departamentonan y companianan di Gobierno. Como tal, a pidi e Hunta di Supervision di FLPD pa pone nan cargo disponibel, pero e grupo completo a nenga di haci esaki
Otro argumento ta cu su persona no tin ningún tipo di confiansa den e miembronan di e Hunta di Supervision. E ta puntra su mes si un Minister no tin confiansa den e miembronan, a base di kico nan por bay traha cu otro. “Ora bo tin un relacion di trabou bo mester tin un confiansa den e persona cu bo ta trahando cun’e”, tabata palabranan textual di Minister Dangui Oduber.
Papiando di e confiansa, Oduber a bisa cu no mester lubida e hecho cu casa di un ex Parlamentario di e Gobierno anterior ta forma parti di e Hunta di Supervision aki. Con un pesona asina ta bay ehecuta e visión y maneho di nos Gobierno.
E di 3 argumento cu a hasi cu Minister Dangui Oduber a yega na e decision di cambia e Hunta di Supervision di FLPD, ta pasobra nan a cambia e statuuut den e afscheidsbeleid di Gabinete Mike Eman II. Despues di elección e miembronan di Hunta directiva a bay Notario pa haci e cambionan den e Statuut, bayendo en contra di bon gobernación. Statuut ta bisa cu e miembronan por keda maximalmente 8 aña, pero a cambia e Statuut manera comosifuera nan por keda eyden pa bida largo. Esaki, Oduber a bisa, ta contra tur regla di bon gobernación.
E di cuatro motivación di Oduber pa finalisa e relación cu e actual miembronan di e HdS di FLPD ta cu den articulo 8 di statuut ta specifica cu ta duna e Minister autoridad pa nombra y destitui e miembronan. Kiermen cu na momento cu e statuut ta dunami, como Minister, e autoridad cu ami por nombra y ami por reemplasa e miembronan, mas cu logico mi ta haci uzo di e articulo 8 di e statuut cu ta dunami e autoridad aki.
E visión di su persona ta cu mester hinca mas placa den deporte, locual e ta haya cu awor no ta tumando luga. Deporte no ta hayando su fair share. Ademas, FLPD a cera un acuerdo cu Bank of Canada c uta haci cu mayoría di e entradanan cu e fundación ta ricibi ta bay pa e instituto aki.
