Di un forma relampago nos prome minister a biaha pa Hulanda. Nos prome minister a acudi inespera y no invita n’e reunion di Gobierno di Reino. A permiti nos prome minister toch pa hiba palabra. E resultado tabata un baño di awa frieuw pa e prome minister. Enbes di logra haya comprension, nos prome minister a wordo humilia. Gobierno di Reino no tabatin misericordia cu gobierno di Aruba loke ta lanta e pregunta kico e prome minister a bay haci Hulanda?
Nos ta kere cu e biaha aki no tin nada di haci cu bishita di trabao. Kisas nos prome minister a core pa un otro escandalo cu a mira luz di dia. Partido Curpa a expone diferente biaha cu e gobierno aki no ta miho cu esun anterior. Den tempo di COVID gobierno no solamente a core fia placa for di Hulanda pero tambe a subi mercado internacional y a haci un prestamo di 253.3 miyon di dollar. Si nos tuma e prestamo di 916 miyon for di Hulanda mas e prestamo haci riba mercado internacional e ta suma cas 1.4 biyon florin. Awo ta cua partido ta esun cu a crea e GIGA DEBE? Si den un aña a fia 1.4 biyon florin cuanto placa mas a fia cu ta scondi?
Nos por a lesa den e landscourant cu nos minister president a firma un decreto di 113 miyon di dollar (2013), 52 miyon di dollar (2014), 127.4 miyon di dollar (2015) y 253.3 miyon di dollar (2020) cu ta suma un total di debe 998 miyon florin cu un interes di riba 10%. Partido Curpa no tin e informacion di e periodo cu e interes ta core.
Un cos ta sigur integro e gobierno aki no ta. Feestvierend ten ondergaan ta sigui pasobra no tin un parlamentario cu curashi pa ranca e plug di e gobierno aki. P’esey awe nos debe nacional ta riba 6 biyon florin pasobra e gobierno aki a fia mas cu 2 biyon florin caba y te awe no tin un presupuesto cu surplus.
Den e caso cu Aruba Bank a apela contra di Otmar Oduber, for di e sentencia di dia 31 di october 2023 nos por a lesa cu tin un empleado publico cu nan a yama spirito y cu a cobra sin traha 120.000 florin. Ta haci mencion di mas cu un persona. Ora ta tuma hende den servicio di gobierno ta tuma decision den ministerraad. Departamento di Recurso Humano ta esun cu ta hinca e persona den e sistema p’e por cobra fin di luna.
E sentencia aki ta demostra cu henter ministerraad ta forma parti di e caso spirito. E persona cu tin cu paga e 120 mil florin back sigur sigur no a vota pa Oduber. Pa colmo Oduber ta laga sa cu ta un fabor el a haci nos minister president. Lo bay crucifica Oduber pero e otro nan si no ta haya nada. Ta cera contricante politico pero ora ta trata votado di partido MEP ta yega na un areglo di pago cu nan. Unda husticia ta keda?
Yearwood cu via di malesa mester busca su derecho via hues mientras cu spirito ta cobra sin traha. Prestatiemanagement ta conta pa esunnan cu ta traha pero esunnan sin traha ta cobra e prestatiemanagement no ta conta. Esaki ta corupcion.
E cartera di integridad ta den man di minister di RAIZ. Nos lo no por spera nada di partido RAIZ pasobra nan tampoco ta para pa integridad. E parlamentarionan tampoco ta para pa integridad. Di tanto nubia scur cu tin riba e gobierno aki no tin un parlamentario cu corahe pa ranca e plug di e gobierno. E supuestamente cristianan den parlamento tampoco ta para pa integridad paso si nan propio gobierno ta pusha leynan cu ta contra di leynan di Dios nan no tin e corahe pa tuma un decision di bisa cu nan ta kita e sosten for di gobierno.
Corupcion ta dilanti di nan nanishi y ta sigui carga nan gobierno manera hendenan cu tin bril di palo bisti. Nos ta kere cu nos tin un Dios husto y su husticia lo cay un ora pa otro. Partido Curpa e unico alternativa.
