Nos ta yegando den un temporada caminda cu lo bay tin entre otro benta di klapchi y hopi cos mas. Tambe e ta temporada di fin di aña cu kerstboom etc.
Segun Frido Dirksz, di e departamento di prevencion di Cuerpo di Bombero y tambe miembro di e comision di vuurwerk, desde comienso di aña ta reuni cu importadornan pa haci nan pedidonan na tempo, pa tur cos yega na ordo.
E aña aki tin 21 container cu mester bin Aruba. 6 a yega y tin 15 ainda na caminda cu mester yega dia 12. Nan ta bezig ta habriendo nan na Wela y ta spera cu e 15 containernan cu yega, tin dianan suficiente pa caba di habri nan.
Loke tin cu tene cuenta cune
Dirksz a sigui splica cu ta hopi importante pa cada doño di cas, tin nan limpi. Tene na cuenta cu tabata tin hopi yobida y tin hopi yerba. Semper tin e posibilidad cu ora cu tira klapchi, e por cende y si tin yerba rond di cas, e por causa un peliger. Cuerpo di Bombero ta pidi pa e kerstboomnan tambe, ora di sali for di cas, kita e plug. No laga e luznan cendi ora bo no ta na cas.
No usa extentionnan largo. No mas cu dos. Uno ta suficiente. Hopi hende ta pas’e bao di tapijt y kier pone te den otro skina y esey por trece problema cu e waya ta keinta y tin candela.
Pa loke ta klapchi mes
E bendedornan tur aña ta wordo yama pa pone nan na altura di e reglanan cu ta wordo usa. Ta pidi pa nan por tin un slang, pasobra un brandblusser ta bon. Pero si no tin’e cu tin likido den dje, ta bira tiki dificil. Puiro ta paga e candela, pero si bo tin suficiente biento, e ta cende bek. Siendo cu awa of nablusser ta yuda cu bo ta paga e candela di berdad.
Cuerpo di bombero presente
Dirksz a comenta cu asina cu douane bay pa klaar e containernan in na Wela Cuerpo di Bomero ta standby eynan. Tin un control pa tur cos cana nechi eynan.
Controlnan riba caya
Dirksz a comenta cu nan ta parti esaki den tres team. Riba dia 27 di December e containernan ta sali y hopi biaha ta haya cu e bendedonan no ta cla ainda pa bende. Ta tira spotcheck riba e luganan ta habri.
Riba dia 28, 29, 30 y 31, ta e dianan mas efectivo cu ta controla henter Aruba. Ta parti e grupo. 70 establecimento ta coy loco pa nan pa controla.
Cosnan cu no ta klop
Tin biaha e hendenan no ta entrega e klapchi bieunan y nan ta purba di warda nan. Nan mes ta pega sticker riba caha cu nan no mag di bende. Si gara eseynan, nan tin problema, e ora e vergunning ta wordo hala aden y tur klapchi ta wordo confisca.
Mensahe
Frido Dirksz a bisa finalmente cu nan ta drenta den accion constantemente. Si tin cualkier iregularidad, nan ta envolve KPA cu ta e instancia cu ta duna vergunning. Si e vergunning mester wordo hala aden ta haci’e di biaha.
Un sugerencia cu ta haci na e mayornan cu ta cumpra klapchi pa nan yiunan, pa cumpra klapchi adecuado pa e edad di e mucha. No cumpra cosnan peligroso pa e mucha mes.
