En conexion cu dia di bombero, Cuerpo Bombero Aruba a tene nan acostumbrado siman di prevencion di candela unda cu a tene diferente actividad. E prome actividad tabata e di 35 Brandweer loop di cual 1000 persona a participa den e categorianan di 10KM Run masculino y femenino, 5KM Walk & Run masculino y femenino.
E siman a continua cu diferente actividad unda cu Cuerpo Bombero Aruba a invita diferente departamento. A organisa e Fire Prevention Week Seso Sport na Post di Brandweer Tanki Flip. E teamnan participante a pasa un anochi ameno y un dushi ambiente. E team ganado tabata Brains on Fire.
E famoso competencia di bowling no a keda afo durant e siman di prevencion. Personal di Hospital, DOW, Ambulance, Spoed Eisende Hulp y Brandweer Aruba a reta otro. Durante e wega di bowling tur hende a disfruta di esaki y na final Hospital a bay cu e victoria.
Den fin di siman a tuma luga e competencia di softball cu a dura 3 dia largo cu un participacion di 34 team na veld di Flatstone. Tur team a competi fuerte contra otro. Diadomingo tabatin un wega amistoso di softball relaciona cu e Siman di Prevencion di Candela. Happy Family v/s Aruba tabata e teamnan cu a clasifica pa e gran final. Ambos team kier a bay cu e victoria pero na final Happy Family a bira e team ganado. Hopi hende a yega veld pa asina apoya nan team preferi sea tabata team di nan colega of familiar.
E ultimo actividad cu siman di prevencion di candela lo ta e Open Dag na Post di Brandweer na Tanki Flip. E actividad lo cuminsa desde 10:00am te cu 5:00pm unda cu lo tin diferente actividad pa tanto adulto como muchanan.
