Cuatro aña pasa, COVID a yega y a golpia Aruba duro. Aruba practicamente ta depende hopi riba turismo. Ronella Croes, CEO di Aruba Tourism Authority (ATA), a comenta y a agrega cu tabata trata di un momento historico pa Aruba. Papia di solamente di e palabra pandemia, no ta un palabra cu hopi hende sa kico e ta exactamente.
Ta varios decada pasa cu mundo a confronta cu un pandemia di e mesun magnitud, manera esun di COVID. Tur a enfrenta e momento ey, no solamente ATA, sigur un comunidad y mundo completo cu algo historico pa cuminsa. Pa por refleha e momento ey, Croes ta corda cu na december, e ultimo kwartaal di 2019, a cuminsa tende di COVID, a cuminsa tende di un malesa respiratorio.
A cuminsa mira diferente impacto cu el a causa. Pero e tabata hopi leu ainda, el a indica. Den 2020, na comienso di aña, ya caba ATA tabatin reunion strategico cu diferente socio. Riba un diasabra a reuni cu henter e hunta di AHATA, den e caso aki, cu tabata puntrando cu si esaki yega mas cerca, kico sa di dje y kico lo por t’e posibel impacto. Segun Croes, na februari ya caba ATA tabatin documento di por lo menos 50 pagina unda cu a haci analisis di kico lo por t’e impacto di un malesa manera COVID. A simula diferente momento di crisis cu Aruba a pasa den dje. Ta bay bek na Natalee Holloway, a bay bek na 9/11, a bay bek momento di guera, kico tabata e impacto pa Aruba y kico lo por e ora ey spera como impacto y kico lo tuma nos pa recupera di e crisis cu lo por ta na caminda.
Hopi rapido mester a ahusta e documento aki y cada biaha mester a monitor, cada siman, tabata sigui Oxford Economics, cu nan ta bisa cu “esaki ta X biaha pio cu 9/11”.“No por a haya un grip riba e impacto. E tabata hopi dificil y e tabata move hopi rapido. Despues mester a tuma decision rapidamente. ATA a haci di su banda y nan tabata hopi activo.”Den e parti di maneho di crisis, ATA a tuma responsabilidad riba dje cu no tabata nan tarea principal. Por ehempel a bisa cu nan lo lidera e trayecto di rediseña henter e plataforma di migracion, p’asina por habri mas rapido posibel, cu un plataforma digital cu tur hende por pone loke Aruba ta exigi di nan pa por drenta, p’asina por mitiga e entrada di COVID tambe.A haci hopi cos y despues tambe, naturalmente, no solamente e momentonan ey, sperando cu e risico y e decisionnan tuma lo trece tambe e retorno spera.
Esey ta haci Ronella Croes hopi contento pa mira con rapido Aruba a recupera y con Aruba a destaca den e maneho di COVID.DI CON ARUBA A DESTACATin algun punto cu a resalta y pakico Aruba a destaca riba otro, ta netamente pa motibo di e maneho, e rapidez. A habri frontera relativamente hopi rapido. Tambe a introduci un seguro por ehempel cu ta algo cu Aruba ta prome cu a haci y tabatin otro maneho cu a resulta hopi bon.E di dos punto cu Croes a remarca, ta cu di parti di Aruba Tourism Authority, como parti di un maneho duradero y sostenibel, tin tambe un fondo di emergencia.ATA tin un fondo di emergencia cu e por a activa durante COVID y a sa di bin dilanti hopi mas rapido cu otro. E resultadonan ta conoci, segun Croes. A mira cu a kibra sigur record riba e indicador principal, a base di cual ta midi turismo, cu ta e entrada, esta e ingreso di placa den nos economia. Esey tabata un record nobo pa Aruba, segun relato di Banco Central, cu ta midi e tourism receipt den e caso aki. E ta un di e puntonan hopi clave cu ta resalta.
Tambe di parti di ATA, a sigui cu nan preparacionnan proactivo pa loke ta trata maneho di crisis. Nan tin reunion cu tuma luga. Siman pasa, cluster 8, manera cu hende ta conoci cu ne, cu t’e cluster cu ta regarda turismo y sector comercial di Aruba cual ATA ta lidera, tabatin reunion.Tabatin grupo di ehecutivo di ATA cu ta biahando aki algun siman pa atende un convencion riba horcan y con pa maneha crisis asina ey. ATA ta sigura cu ta sigui pone atencion riba esaki tambe, pasobra sa con crisis por ta devastador pa turismo y turismo ta hopi sensitivo. Hopi importante tambe ta cu pa casualidad cuater aña despues di e parti di COVID, ta den reunion strategico cu parti di e ekipo di ATA, p’asina traha riba nan siguiente plan di maneho como ATA cu lo cubri un total di 5 aña cu aspiracion pa 10 aña cu lo delinea aworaki. Ey lo tene cuenta cu e realidad nobo cu ta aden. No solamente cu turismo despues di COVID a cambia e panorama bastante, pero tambe e realidad di Aruba, unda cu ta papiando di diferente expansion di hotel, tur cu nan reto y oportunidad. ATA ta sigur, pone hopi atencion riba esey, mientras cu ta haci otro analisis di capacidad di carga y diferente otro aspecto cu ATA ta trahando riba dje caba y algun cu a finalisa.
“Mientras cu ta haci esey, ta delinea tambe e strategia y vision di nos banda, loke nos ta kere cu Aruba mester encamina e proximo añanan considerando e realidad cu nos ta aden.” Tocante Aruba Tourism Authority (A.T.A.) A funda Aruba Tourism Authority ‘Sui Generis’ dia 1 di januari 2011. Un organisacion independiente, pero den un esfera publico. Aruba Tourism Authority ta fungi como ‘Destination Marketing and Management Organization (DMMO)’ y ta responsabel pa uni interes turistico entre socionan local y internacional. E industria di turismo di Aruba a mustra un resiliencia y un rendimento impresionante. Entre aña 2011 y 2023, e sector di turismo a mustra un crecemento fuerte. E entrada di turismo, of miho conoci como “Tourism Receipt”, a subi cu un promedio anual di 10%. E cantidad di bishitante cu ta keda tambe a crece na un averahe di 10% anualmente. E entrada pa camber disponibel, conoci como “Revenue per Available Room” (RevPAR), a subi cu un averahe di 11% tur aña.
E yegada di e bishitantenan di crucero a mustra un indice di crecemento anual cu un promedio di 24%. Si analisa resultadonan di aña 2023 compara cu aña 2011, ora ATA a bira un entidad independiente den e esfera publico, por nota cu “Tourism Receipt” a aumenta cu 94%, yegada di bishitante a aumenta cu 43%, “RevPAR” a crece cu 82%, mientras cu yegada di turismo crucero a crece cu 36%. E cifranan aki ta subraya e exito y desaroyo sostenibel di e sector turistico di Aruba, desde cu a funda ATA SG. A.T.A. ta pone hopi enfasis riba e e modelo di “High Value-Low Impact”, un balans entre di un banda aumenta e balor economico di e bishitante y na otro banda posiciona Aruba como un pais desea y sostenibel. E meta ta pa aumenta entrada pa medio di calidad di turismo en bes di cantidad. Segun World Travel and Tourism Council (WTTC), ta proyecta cu e contribucion total di biahe y turismo na GDP di Aruba lo alcansa 74% pa aña 2023.
