Cu un curason sincero nos ta acerca abo , como pueblo, pa uni cu nos den oracion Diabierna Santo for di 6am-9am na no Hit94FM. Y cu un curason sincero , nos kier bisa bo cu pa peticion di oracion bo por manda un e-mail na [email protected] y tambe si bo ta sinti riba bo curason pa aporta cu un donacion of ofrenda pa yuda nos cu gasto di transmision bo por manda un mensahe riba nos Whatsapp 7403237.
Dios ta wak sinceridad di curason, y manera nos curason ta cu ne , asina e ta trata cu nos, pesey nos ta invita bo pa ora, y nos meta ta pa tur hende riba e isla aki yega na conocemento di e palabra di Dios y sirbi Dios cu un curason sincero.
Sinceridad ta fundeshi di integridad, sin un curason sincero un hende no por ta integro, pasobra tur hende por wak bo cara mas Dios ta wak bo curason. Tur peticion haci dilanti di Dios, ta wordo midi cu sinceridad y cu Fe. E Oficial di Snoa a yega dilanti di Hesus cu un curason sincero y cu Fe y a bisa: Mi yiu ta muriendo por fabor bin pone bo man riba dje pa e por bira bon y biba ( Marco 5:23). Sinceridad a sali for di boca, na momento cu e a reconoce cu Hesus ta Esun cu por cura su yiu.
Ora nos ta haci oracion, nos no por hunga sincero, nos mester ta sincero, pasobra solamente cu sinceridad nos por haya locual cu nos ta pidi, hopi biaha e oracion no ta contesta, y nos ta murmura, pero locual cu nos no ta haci ta, nos no kier reconoce cu nos no ta sincero. Sinceridad ta hala atencion di Dios.
Nos kier mira milagro sosode, pero nos no kier acerca esun cu ta haci milager, tur hende cu a acerca Dios cu un curason sincero a ricibi locual cu nan a pidi. Hebreunan 10:21-22 ta bisa lo siguiente: Y como cu nos tin un gran sacerdote riba e cas di Dios, laga nos hala cerca cu un curason sincero yen di siguransa di Fe cu nos curason purifica di un mal consenshi y nos curpanan laba cu awa puro. Ta nos sinceridad y Fe ta pone milagro sosode, den e buki di prome Samuel Capitulo 1 Ana tabata steriel y e no por a duna luz, Ana a yega cu un curason sincero dilanti di Dios y a bisa Señor si bo duna mi un yiu lo mi entrega e yiu na Abo, y e lo sirbi bo, y no a pasa mucho cu Anna a sali na estado y duna luz na profeta Samuel.
E Centurion a bisa Señor mi no ta digno pa bo drenta bao di mi dak , ma papia un palabra so, y mi cria lo ta cura. Un reconocimiento sinsero di curason, ta provoca , arepentimento y milager. David a bisa mi a peca contra Señor y profeta Natan a contesta lo bo no muri, pasobra tabatin un arepentimento sincero.
E criminal riba cruz cu tabata banda di Hesus, a bisa: Señor corda riba mi ora bo drenta den bo Reino, Hesus a contesta awe mes lo bo ta hunto cu mi den Paraiso, e homber no obstante tur su foutnan tabata sincero, y e a ricibi salbacion prome cu Hesus a muri na Cruz pa nos picanan. Hopi hende no ta compronde e sinceridad di Dios cu nos,cual nos por lesa den Juan 3:16.
Den preparacion pa Diabierna Santo, 2-4-2021 nos kier pidi nos pueblo cu laga cada peticion cu ta Sali for di bo boca Sali for di curason sincero y cu Fe, pa asina bo ricibi contesta di Dios, mas sincero nos ta cu Dios mas sincero y fiel Dios ta cu nos.
Por ehempel si un mama ta avisa un tata, cu un yiu ta Sali cu hende robes y cu e yiu no ta tende, y e ta bini cas marduga , y bo ta sinti holo di alcohol, y despues e yiu cay den man di Polis, y e tata bisa cu e no tabata sa di nada e tata no ta sincero cu e mama , ni cu Dios y tampoco cu su yiu. Asina profundo sinceridad ta yega den nos bida.
Uni cu nos Diabierna Santo Mainta na bo Hit94FM for di 6am- 9am pa asina cu un curazon sinsero nos presenta dilanti di Dios y asina Dios scucha y contesta nos oracion.
Sinceramente
Pastoor Marcel Balootje.
