Cruz Cora ta un di e instancianan cu ayudo di otro organisacionnan cu ta saliendo tur dia riba caya pa entrega cuminda na esnan mas den necesidad. Marla Thiel Dominguez, coordinado di e proyecto aki pa Cruz Cora, cu ta forma parti di e CovidTeam, ta splica con e proyecto ta hinca den otro.
Asina por ehempel den fin di siman tin un programa cu ta entrega cuminda, subsidia door di Cruz Cora mes, na adictonan ambulante. A enfoca riba e grupo aki den fin di siman pa motibo cu mayoria di restaurant ta cera, cualnan antes tabata duna e adictonan ambulante toch algo di come. Na momento cu a parti esaki, a constata cu tin mas hende ta bin busca cuminda, di cual mayoria ta inmigrante. Ta duna nan cuminda, pero nan mester yena un formulario. Apesar cu en principio e cuminda ta pa e adictonan ambulante, ta registra nan.
Dialuna ultimo a cuminsa hunto cu CEDE Aruba y YMCA e programa “Meals on Wheels”. E persona por haya cuminda un of dos biaha pa siman, mester aplica riba e website di Cruz Cora cu ta www.redcrossaruba.com y drenta den e seccion help covid y ta haya e programa di “Meals on Wheels” unda por aplica pa haya cuminda cayente. Ta entregando 100 cuminda pa dia, cu e posibilidad cu e por sigui aumenta. E ta un programa di CEDE Aruba y YMCA y e boluntarionan di Cruz Cora ta percura pa entrega e platonan diariamente na e diferente adresnan. Tur dia ta haya ma registracion, cu ta e motibo cu no por priminti cu un persona ta haya cuminda tur dia.
Mester partie den forma cu tur hende por yega na turno. Pa e programa aki tin suficiente boluntario. Den cada Van ta saca tres persona y mester tene cuenta cu siguridad. UN Van ta bay San Nicolas, otro ta bay Playa / Dakota y e di tres ta bay Santa Cruz y otronan barionan. Boluntarionan ta trahando riba un programa pa haya sa kende ta tur esnan cu ta den necesidad di ayudo.
