Durante un solo siman, entre 14 pa 21 di juni 2019, tur cliente cu a cumpra un television, sea mesora of via credito, a participa den e campaña di Crown Aruba. Mas di 100 cliente a cumpra television, pa cual e compania mester scrap mas of menos 100 mil florin na benta, estilo “likida y lubida” e compra of fiansa. No ta importa ki tamaño di television a cumpra, tur cliente ta hay’e gratis!
Prijsnan di television na Crown Aruba ta start for di un pantaya di 32 inch di Afl. 649,35 te na un pantaya di 86 inch cu ta costa Afl. 10.199,=. Mas di 100 cliente a cumpra televisionnan entre e dos prijsnan menciona, manera Crown ta promove riba nan website oficial.
Esaki no ta prome biaha cu Crown Aruba, cu a habri su portanan for di aña 2004 caba, ta organisa e campaña promocional aki. E ta un “marketing stunt” cu no solamente ta promove benta pa e compania pero ta duna nan hopi cobertura, exposicion y reconocimento di marca a termino corto y largo. Cada biaha Brasil hunga, e cantidad di mencion di “Crown” riba rednan social ta impresionante y ta fortalese nan presencia den mercado.
No ta prome biaha ta organisa e campaña aki. E prome biaha tabata den Copa Mundial di Futbol y e bet tabata riba e ekipo di Hulanda. E aña ey Hulanda a bay te final y a perde durante e ultimo wega. Hopi a bisa e tempo ey cu “Crown a scapa”. A bolbe organisa e mesun tipo di campaña cu Colombia den Copa America y despues atrobe cu Brasil den Copa Mundial y awo Brasil atrobe Copa America.
Con lo entrega e premionan na clientenan no ta conoci ainda. Te mas di 100 cliente lo mester haya un recibo cu e stempel di “PAID” riba dje, danki na e victoria di Brasil awe riba Peru di 3-1, den final di Copa America.
