Tin un grupo di criado di bestia cu ta fada, harta y kier pa autoridad actua. Nan ta perdiendo tur nan bestianan na man di ladron.
Mas tristo ta cu supermercadonan Chines ta cumprando e bestianan aki for di man di ladron y e bestianan aki, loke ta mas peliger pa pueblo ta, cu e bestianan ta wordo mata na cas, den forma clandestino cu tur consecuencia.
Abo ta yega cumpre na prijs barata den supermercado Chines. E Chines a cumpr’e horta y ta resulta mañan e cabrito aki a resulta tabata tin un malesa of algo y mañan bo no sa di ki b’a muri of bira malo.
Na Weng Kee mes a haya mas cu 100 kilo di carni di Cabrito cu ta cabrito cumpra clandestinamente y horta prome cu el a wordo mata. E hendenan aki ta mata e cabritonan na cas despues di hortanan y bende esaki na e chinesnan manera Weng Kee entre otro. Den e caso aki hasta un trahador di Weng Kee J. Wernet a keda deteni pasobra e ta sospechoso di e ladronicia di Cabrito.
Nan tabata tin un Ford Explorer bieu cu nan tabata usa pa pasa horta Cabrito. Nan a adapta e auto cu un compartimento special y baha e asientonan di patras pa hisa e cabritonan benta den e auto y sigui bay. Ora autoridad a coy e auto, e tabata tin dugtape y otro materialnan pa mara e cabritonan. E luznan di e auto tabata tur tapa cu tape tanto dilanti y patras. Esey ta pa no mira e luznan anochi na momento di bay horta. Polis a confisca e Ford Explorer.
Hopi bestia
Anthony Walle ta un di e criadornan di bestia. Preocupacion tin ta cu tur ora nan ta keda horta y nan mester ayudo riba esaki. Cos no por sigui asina mas. Awendia casi no tin criado mas. Loke cu keda, e hobennan cu lanta, no tin perseverancia den e cos aki.
A perde nan
Walle a splica cu un luna pasa a cuminsa perde bestia. E tabata perde prome caba. El a hasta cay cera pa via di e cos aki, el a splica. Cuater siman pasa a cuminsa perde bestia atrobe. El a perde 14 bestia. Siguiente siman nan a bay cu 36 pa 37 bestia atrobe. Den dia e cosnan aki den su cura.
Supermercadonan Chines
Tin cosnan ta pasando. Por a tuma nota den media cu nan a coy 100 y pico kilo di bestia den un supermercado Chines. Walle ta pensa cu ta su bestianan, pasobra ora el a haya e ladronnan, e Chines a manda di biaha un abogado pa e persona cu tabata hortando e bestianan. E ta mira e link cu ta su bestianan e mester ta.
Kico mas por wordo haci
No ta cuestion cu e bestianan ta sali cay y hende ta bay cu nan. Walle ta splica cu su bestianan ta cera, cu nan ta coynan paden. E mes no sa si e ladron ta afo. E sa si cu a gar’e, pero cos ta mustra cu aki 10 dia, e lo ta afo. Ningun hende no ta yuda. Santa Rosa ta bisa cu nan no por yud’e. Asina aki si cos no por bay.
Criamento di bestia
Practicamente no tin mucho hende ta cria bestia mas. Ta ladronnan so ta biba di dje. Chinesnan ta cumpra carni horta, tur hende ta cumpra carni horta. Si abo mester bende carni, nan ta bisabo ta caro. Pero otro caminda nan ta cumpra carni barata.
Polis
Walle no sa ki speransa e tin. Ora cu el a haya su bestianan, polis a bisa cu e caso ta bay bira largo. Miho coy e bestianan cu tabata tin na bida y bay cu nan.
Jacinto Werleman ta un otro criador cu a perde carne. Ta un total di 6 cu a wordo horta y dialuna cu a pasa el a bin haya 4 carne na bida. E otronan si, e no sa unda nan a bay. Un persona cu den e caso aki cu a detene a bisa ta cumpra el a cumpra nan, pero Werleman no ta kere esey. Ta polis tin cu saca afo ta na unda a cumpra nan. Y Si el a cumpra mes, ta for di ken.
Kico esaki ta nifica
Esaki ta un hobby pa e criadornan di bestia. Werleman mes despues di trabao, ta corta yerba, pasa dam busca awa y hiba cunucu. Ora cu bo yega cunucu, bestianan no tey, a bay cu nan. Awo despues di casi tres siman, el a logra haya 4 di nan toch.
A lanta cabes
E tabata pasa antes caba. Pero awo el a lanta cabes cu tur siman nan ta horta bestia. Un investigacion tin cu wordo haci pa haya sa kendenan tur ta horta. Segun Werleman ta horta den tur bario y parce cu ta un grupo e ta. E mes tin un cunucu basta scondi, pero asina mes nan a yega na dje.
Hendenan conoci
Segun cu Werleman por a wak, un di nan ta traha na un supermercado Chines, unda cu nan a haya mas di 100 y pico kilo di bestia.
Mensahe
Habitantenan mester wak unda cu ta cumpra carni. Cumpra carni unda cu e bestianan cu ta wordo mata na abattoir. Eynan nan ta wordo gekeurd. Si bay cumpra un bestia barata, eynan sa cu e bestia no tin stempel, y ta mata na cas. Esnan cu kier bestia, bay cri’e pa bo tin. No probecha di otro. Otronan ta pasa duro pa cria nan. Cuminda di bestia no ta barata mas. Bo kier tin bestia bo come, bay cri’e, of bay cerca esun cu ta cri’e, cumpra un for di dje. No bay horta cos cu no ta dibo.
