Den cuadro di e esfuersonan cu Gobierno di Hulanda ta haciendo pa yuda e islanan den Caribe Hulandes, awe atrobe a yega un avion cu 10 nurse y 1 dokter pa asisti den e unidad di cuido intensivo na Dr. Horacio E. Oduber Hospital. Nan ta Mericanonan cu tabata staciona na Corsou, wardando un yamada pa activa sea pa Sint Maarten, Corsou of Aruba. Gobierno di Hulanda a paga tur nan gastonan, mescos ta cumpramento di ekiponan medico pa e unidadnan di ICU na e islanan.
Minister Dangui Oduber, encarga cu maneho di Salud Publico riba nos isla a acepta e sosten aki cu brasanan habri. No a busca e grupo aki na un prome instante pasobra no tabata necesario. Awor aki, mirando e cantidad di casonan activo y pashentnan birando malo drentando Hospital, awo a pidi Hulanda pa manda e ekipo di sosten medico aki pa nos isla.
E mandatario a bisa cu, a acorda cu Gobierno Hulandes, cu Aruba por pidi te cu un maximo di 35 nurse/dokter for di e compania di Merca. E grupo awo lo keda pa un luna na Aruba, pero cu opcion pa rek e cu 6 luna mas, si ta necesario.
Ta bon pa bisa cu tur di nan tin experiencia amplio trahando den unidadnan di cuido intensivo, tin experiencia cu mashin di respiracion y tambe cu Covid-19. Nan rol aki no solamente lo duna un sosten na e trabounan andando pero tambe lo por pasa nan experiencia over na e nursenan y Dokternan local.
