Despues di mas cu un ora cu hues a trata e caso sumario cu sindicato STA a cuminsa contra Triple A, na final hues a conseha e partidonan pa sinta na mesa. A pesar di esey, el a pone un fecha tentativo pa anuncia su decision, cu ta 21 di april.
E problema ta sinta den e hecho cu gerencia di aeropuerto a yega na un acuerdo cu FTA pa haci cambio den CAO net un dia prome cu STA a gana e referendum.
Asina por ehempel no a haci pago di e bonus di fin di aña. Diego de Cuba, presidente di STA, a bisa cu esaki ta algo cu FTA no por dicidi pa su miembronan.
E situacion menciona ta haci tambe cu STA ta evaluando pa bolbe pidi un referendum pa representa tur trahado di aeropuerto. Awo nan ta representa e cinco seccionnan di operacion.
Aeropuerto di nan banda a insisti cu tin un protocol firma door di FTA cu a bay di acuerdo cu e dos fasenan pa baha gasto (reduccion).
Ya caba na final, hues a bisa e partido pa mira si nan no por sinta na mesa y trata di yega na un acuerdo. Asina mes a duna un fecha pa sentencia, cu ta 21 di april. “Si mi no tende nada di boso, e sentencia lo ta riba 21 di april.”
